Director di WEB, Luis Oduber, a splica riba e sistema cu nan a invadi. Loke nan a haya ta un ransomware, caminda cu nan ta ataca e filenan y unico manera cu por haya nan bek ta door di paga. Den e caso aki el a wordo conteni mesora. Ta algo cu a sali 6’or di atardi diadomingo, caminda cu WEB su oficinanan tabata cera y dialuna mainta, rond di 10’or y mey, via un mail, un colega a habri un attachment caminda cosnan straño a sosode. E team di ICT a tuma accion y a contene esaki ora cu a tuma accion di biaha. Esaki a haci cu a dicidi pa shotdown di biaha. E reto a cuminsa con ta bay remedi’e. Tabata tin diferente reunion. E prome parti ta pa paga y ta haya e filenan bek. Pero esey tin e riesgo cu paga, e ora ta bira un target. Si ta ataca y cada rato ta paga, ta sigui ataca y saca mas placa. A tuma contacto cu companianan internacional cu ta traha cu WEB door cu ta uza nan sistemanan, y splica nan riba e caso cu WEB tin y e ora nan tambe a ripara cu ta algo nobo. A cuminsa traha riba un antivirus y esey a dura mas of menos dos dia. Te cu diaranson anochi a haya un antivirus. A test’e diaranson den dia y a funciona. Diahuebs a bay pa scan tur sistema. Mester a cende tur cos bek y scannan un pa un y percura pa e virus no tey. Despues awe a reestablece e operacion normal. A reuni y sinta wak con tin algun medida adicional lo bay tuma, pa purba preveni pa yega eynan.
E investigacion a tuma luga caba. Door cu WEB ta asocia na e companianan aki, e informacion a yega. A haci e keho na e instancianan concerni. No sa te unda nan por bay cun’e. Den e casonan asina tin cu bay hinca FBI, CEA, ta algo mundial y ta tarda hopi. Den e parti di WEB, ta gewoon preveni. For di aki, WEB ta gradici su team di empleado pa e pasenshi cu nan tabata tin, pasobra tabata un siman druk y cuminsa coy meter etc. y tur esey a para. Un biaha mas nan por a reanuda e trabao y a traha den e fin di siman aki pa catch up e dianan perdi pa asina reestablece e operacion normal atrobe.
Esaki sigur ta algo di exterior. E director por a hasta bisa cu ta cuater colega a ricibi e mail aki, di cual un di nan a habri’e y eynan el a plama. No tin nada interno, no tin nada di investigacion, e director a enfatisa.