E sospechoso di origen Curasoleño., Ludgardo S. fo’i Tilburg, a anuncia a traves di su abogado cu e no a hunga ningun papel den e asesinato di e reportero di crimen Peter R. de Vries. Durante un audiencia ayera, el a ilustra riba su inocencia y a rechasa e acusacionnan di Ministerio Publico.
Ministerio Publico ta sospecha cu Ludgardo, di 35 aña, a haci un recon (reconocemento of investigacion preliminar) y a busca informacion riba Internet prome cu e atake, pa cual ta exigi un castigo di diescuater aña di prizon.
Ludgardo, kende a biaha di Corsou pa Hulanda dia 22 di mei 2021, ta considera pa poder hudicial como un di e reconocedo preliminar. Ta wordo bisa cu e tabata na Amsterdam dia 11 di juni pa realisa un reconocemento. Sinembargo su abogado ta para riba cu Ludgardo tabata den e ciudad riba e dia ey cu fin recreativo, manera “relaha, sali, come y wak muhe.”
Tambe e ta nenga di a participa den un bishita dia prome di juli hunto cu e otro dos sospechosonan, loke poder hudicial ta considera un investigacion preliminar n’e studio di RTL Boulevard y n’e garashi caminda cu De Vries a parkeer su auto.
Fuera di esey, Ludgardo no ta corda kico el a haci e anochi anterior di e intento di asesinato, momento caminda cu Ministerio Publico ta indica cu e atake realmente mester a sosode.
Segun defensa, e contactonan entre Ludgardo y e co-sospechoso Diviany K. tambe di Corsou, no ta referi n’e atake, sino n’e “comercio di mercancia posiblemente prohibi.”
Peter R. de Vries a ricibi un tiro dia 6 di juli 2021 despues di un transmision na RTL Boulevard y a muri pa motibo di su heridanan nuebe dia despues. Ministerio Publico ta sospecha cu e atake a tuma luga riba ordo di Ridouan Taghi, pasobra De Vries a yuda e testigo clave den e proceso di Marengo. Taghi ta nenga cualkier envolvimento y no ta sospechoso den e caso aki.
Diabierna lo tuma luga e pleidooi di defensa di e supuesto sicario Krystian M. y e tirado Delano G., pa cual a pidi cadena perpetuo, como tambe contra e supuesto chauffeur di e auto di huida, Kamil E. E veredicto di e caso aki ta wordo dicta pa juni.
Envolvimento di De Vries den caso Natalee Holloway
Peter R. de Vries a hunga un papel importante den e caso di Joran van der Sloot. El a participa den e investigacion di e desaparicion di Natalee Holloway na 2005, caminda cu Van der Sloot tabata wordo considera como sospechoso. De Vries a investiga e caso den su profundidad y a organisa varios entrevista y confrontacion cu Van der Sloot pa haya mas informacion.
E papel di De Vries den e caso di Joran van der Sloot por considera como complica debi n’e naturalesa compleho y delicado di e caso. El a participa den e descubrimento di echo y prueba nobo, pero su enfoke tambe a wordo critica p’e envolvimento etico y huridico di su metodonan. Su envolvimento den e caso a ricibi tanto elogio como critica y su papel a contribui n’e complehidad di e caso y atencion mediatico cu el a ricibi.