Diabierna ultimo bou di un entusiasmo grandi e temporada mas dushi di baseball a inicia na Aruba. E organisacion di Aruba Little League a inicia cu nan campeonato cu un bunita ceremonia di apertura den Joe Laveist Ballpark na San Nicolas. Mester bisa cu un bes mas varios ekipo di Nort, Center y South League den e divisionnan di Little, Junior y Senior a participa na e bunita desfile cu tabata uno colorido cu e ekiponan bon uniforma. Tur e ekiponan ta cla pa competi pa e titulonan maximo di 2017. E campeonato e anja aki a wordo dedica na Serio Romney, Esmond Jones y Kiwanis Aruba cu tin hopi anja ta colabora cu Aruba South League, mientras cu Suwbay Aruba a bira un di e patronisadornan principal di Aruba Little League.
Pa varios aña nos seleccionnan di Little League a logra yega torneonan di nivel mundial den Little, Junior y Senior League esaki na Williamssport, Taylor y Bangor, aunke den e ultimo tres pa cuater añanan nos muchanan no a logra clasifica pa un torneo di tal magnitud apesar di a demostra un bon baseball. Na 2010, Aruba a logra un titulo mundial den e division di Senior League na Bangor, Maine. E deporte di baseball ta un di esnan mas gusta y practica na Aruba mientras e interes ta birando dia pa dia mas grandi. Esaki ta danki na e demas entrenadornan tur den forma boluntario cu dia den, dia afo ta para riba tereno baseball y siña nos muchanan eherce e deporte mas popular den e region di Caribe. Un palabra di exito na tur e ekiponan participante tanto den Nort, Center y South League.
Un danki sigur na Lotto, e Loteria di Aruba pa medio di Comision di Subsidio cu ta yuda subsidia e campeonato di baseball organisa pa Aruba Little League.
Cumprando weganan di Lotto, e Loteria di Aruba manera Catochi, Big 4, Zodiac, Wega di Number Korsou, Lotto di Dia, Lotto 5, Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.