Diahuebs atardi, e Central American and Caribbean Amateur Swimming Confederation Games 2018 (CCCAN) a inicia cu e ceremonia di apertura na e Pisina Olimpico Roly Bisslik na Savaneta. E atardi a inicia cu e canto di nos tono glorioso Aruba Dushi Tera, sigui pa e desfile di e 24 paisnan participante dilanti un publico grandi y invitadonan presente. Entre e invitadonan nos por a mira Su Excelencia Minister President, Sra. Eveline Wever Croes. E islanan di Antigua & Barbuda tabata esnan prome den fila pa habri e apertura, mientras e atletanan di nos dushi isla di Aruba como pais anfitrion tabata e ultimonan den e fila, caminda cu bou grito y aplauso nan a ser ricibi. A sigui cu un bunita demostracion acuatico presenta pa nos atletanan di landamento artistico, mientras e show carnavalesco combina cu e ritmo di brassband no por a falta e atardi aki. Loke a resalta den e diferente discursonan ta e hospitalidad di nos dushi isla na nos bishitantenan. Na banda di e competencia di CCCAN, e paisnan por disfruta di loke Aruba ta ofrece na nan. Un trabou di preparacion grandi tin tras di e CCCAN 2018 cu lo conta cu un participacion di 479 atleta y 148 oficial deportivo procedente di 24 pais den nos region. Pa cu esaki a gradici e comision organisador y e grupo di boluntarionan cu for di algun luna atras tur dia ta trahando masha duro mes riba e campeonato di CCCAN 2018.
Stichting Fundacion Lotto pa Deporte a inverti un suma cuantioso den e renobacion di e Pisinaa Olimpico Roly Bisslik na Savaneta unda a cambia e sistema di e regulacion di awa, e pone un timingsystem nobo, tambe a drecha e postenan di lus cu miho claridad y duna e lugar un otro cara door di verf esaki.