Lotto, bao maneho di CBN, garantizando fondo no solamente pa deporte y ganador, pero pa economia di Aruba tambe

Na 2011 CBN a wordo pidi pa Gobierno di Aruba pa asumi maneho di un Loteria cu tabata den problema financiero serio. Apesar di e risiconan financiero enorme, Canadian Bank Note Company (CBN), a asumi e reto aki cu un plan di negoshi objectivo y transparente cu e fin di genera fondo pa su cliente St. FLPD y subsecuentemente tur federacionnan deportivo na Aruba via benta di loteria.
CBN ta contento y orguyoso cu e risico aki a resulta den un exito pa deporte di Aruba. For di momento cu CBN a asumi maneho di e loteria nacional, a cumpli cu su parti di sigui inverti den tecnologia di loteria y sigura un modelo di negoshi rendabel y likido. E impacto positivo riba ganadornan di nos premionan y economia di Aruba tawata enorme te awor, tambe a crea fondo substancial pa deporte:
Premio y comision
A paga mas cu 200 miyon florin na premio;
Comision paga na alrededor di 180 rebendedor a surpasa 45 miyon florin.
Gobierno den su totalidad y bon causa
A contiribui na impuesto un suma alrededor di 9.8 miyon florin;
Un suma alrededor di 44.5 miyon florin a wordo genera pa benificio di deporte y bon causa, cu a wordo traspasa na e canalnan concerni.

E hecho cu CBN su maneho, carga pa profesionalnan local, a logra hisa e entrada di e loteria cu 25%, ta haci cu debenan di St. FLPD por a wordo paga puntualmente, e finanzas di e loteria por a wordo sanea y e contribucion na pais Aruba (den tur e formanan menciona aki riba) por a wordo maximaliza. No solamente a crea entrada extra, pero a renegosha e contract na 2017 pa mas fondo ainda bai pa federacionnan deportivo.
Reciente Minister Andin Bikker a presenta un nota di cambio na unda lo habri porta pa un cantidad sin fin di loteria na Aruba, un mandato cu ta en pugna cu acuerdonan haci na aña 2011 entre Gobierno di Aruba, St. FLPD y CBN. Cu e vision pa crea un operacion di loteria rendabel, Gobierno a garantisa St. FLPD y CBN cu nan exclusividad parcial pa loke ta trata weganan di jackpot, a cambio di e rescate financiero di St. FLPD.
Mescos cu na mayoria pais, incluyendo Hulanda, e licensia pa ofrece weganan di jackpot lo tawata solamente disponibel pa e loteria nacional. Aumentando e licensianan pa loteria lo por wordo considera como un violacion di e acuerdo aki, cu consecuencianan financiero pa Aruba. Na varios ocasion CBN a purba di dialoga cu Gobierno existente y anterior riba e topico y aumento di contirbucion na deporte di Aruba, na unda lastimamente no a haya oido of atencion alguno.

 

Comments

comments