CALIFORNIA, Merca- E ciudad di Los Angles ta purbando di controla e candela mas grandi di su historia, declara diabierna atardi. E candela aki a destrui ya caba mas di 2387 hectarea.
E candela, denomina “candela di Tuna” a extende pa e montañanan Verdugo, un zona natural na 300 km di e centro y hopi cerca di e ciudadnan di Burbank y Glendale.
Servicio Meteorológico Nacional a splica cu mas probable ta cu e candela lo a cuminsa door di e “temperaturanan peligrosamente halto” cu a keda registra den e ultimo dianan y cu a faborece e crecemento di e vlamnan. Segun cuerpo di Bombero di Los Angles, solamente 10% di e candela ta bou di control.
Por lo menos 700 persona a wordo evacua diadomingo rond di e localidad. Gobernador di California, Jerry Brown a declara estado di emergencia den e condado, riba peticiion di e alcalde di Los Angeles, Eric Garcetti, kende a pidi yudansa estatal y federal pa controla e situacion.
“Esaki ta e candela mas grandi, cua superficie, cu nan a yega di experencia na Los Angeles”, Garcetti a sigura. Autoridadnan a afirma cu pa aworaki no tin victimanan mortal ni heridonan, aunke cu e candela a destrui tres edificio.
Mas di 700 vivienda perteneciente na Burbank, Glendale y Los Angeles a wordo evacua door di e peliger cu e candela ta forma.
Servicionan di emergencia a indica cu e biento cambiante di e zona ta strobando e labornan di extincion di e vlamnan.
E candela a wordo declara pa 1 or y 26 di atardi diabierna den e barrio di Sun Valley.
Fuente: https://www.elheraldo.co/