Presidente di Lone Wolf Bikers Aruba Veroushka Werleman a anuncia cu e team di Harley lo ta organisando un Back to School Bike Tour. E grupo aki ta un grupo cu tin un pasion pa core Harley y tambe ta core pa un bon causa y ta boluntario pa diferente organisacionnan. E aña aki a dicidi di haci un proyecto di Back to School pa yuda 10 mucha di EPB, 5 mucha di EPB San Nicolas y 5 mucha di EPB Hato.
E team di Harley, Lone Wolf Bikers Aruba a keda sosteni door di Glitz Casino cu ta apoya e grupo di Harley cu nan actividad y pa es motibo aki mes a haci nan conferencia di prensa na Glitz Casino pa anuncia nan proyecto pa recauda fondo pa yuda algun mucha bay scol cu loke cu nan tin mester pa henter e aña. Na Glitz Casino tin diferente weganan atractivo cu por hunga y hungando na Glitz Casino abo ta haci posibel pa Glitz casino por sigui aporta bek na comunidad.
Lone Wolf Bikers Aruba lo yuda 10 mucha cu ta bishita EPB mescos cu aña pasa. Beto Werleman cu ta vice presidente di Lone Wolf Bikers Aruba tambe tabata presente y a anuncia cu e ride lo ta dia 6 di Augustus y e inscripcion lo ta 35 florin. Cu loke nan recauda lo paga uniform, schoolgeld , tas , buki y tur loke e mucha tin mester cu e por cuminsa scol completo pa e aña escolar nobo.
Banda di e 10 muchanan di EPB cu Lone Wolf Bikers Aruba lo yuda, tambe ta scoge dos klas di 5de y 6de klas cu lo haya nan tas y tur loke cu nan tin mester den dje. Amantenan di Harley tur por bin inscribi dia 28 di juli na Baby Back Grill na punta di caya na playa y e inscripcion lo cuminsa for di 7 or di anochi.
Tambe ta bay tin algun coredonan internacional di Surinam, Curaçao, y Boneiro cu lo participa. E dia di e ride lo ta bay ta un dia yena cu actividad, unda cu lo ta bay tin diferente stop nan pero tambe diferente weganan cu lo haci pa asina hunto pasa un dia alegre , pero alabes ta contribui pa un bon causa cu solamente 35 florin.