Durante e conferencia di prensa semanal di POR, e Forsa Nobo, mr. Andin Bikker a declara cu ela tuma nota cu tin hopi preocupacion y consternacion a base di un carta cu siman pasa a sali for di Directie Telecommunicatie zaken (DTZ), dirigi na diferente doño di stacion di radio na Aruba. E carta ta basa riba un interpretacion di ley di Directie Telecommunicatie Zaken (DTZ) referente den cua temporada programanan cu contenido politico lo tin mag di wordo transmiti.
Den e carta basicamente DTZ a informa cada radio emisora na Aruba cu solamente partido cu entrega lista tin e derecho pa provee programanan cu tin contenido di indole politico desde e entega di lista. E di dos parti cu e carta ta bisa cu e partidonan cu den eleccion pasa a haya representacion den Parlamento lo por haya 15 minuut (!) maximal un biaha pa siman y cada siman ta un di e partidonan ey so tin e oportunidad pa por tin programa politico na radio. DTZ ta basa su mes riba decretonan cu segun e director lo ta vigente y/of aplicabel ainda.
Sinembargo mr. Andin Bikker a haci un analisis huridico y den su concepto e decretonan aki ta nulo ya cu nan ta contra di nos Constitucion. Nos Constitucion dia cu e la keda forma y a bin na vigor na momento cu Pais Aruba a haya e status autonomo na 1986, ta un Constitucion hopi avansa. Articulo 22 di e prome capitulo di nos Consitucion ta bisa cu si un ley (e por ta un ordenansa, decreto of decreto ministerial) ta contra di un derecho humano cu ta ancra den e prome capitulo, e no ta bin na vigor y/of e no ta haya aplicacion.
Segun mr. Andin Bikker pues e decretonan cu DTZ ta referi na dje no ta aplicabel mas. E realidad tambe ta cu decretonan aki no a wordo aplica pa añanan largo y en todo caso nan ta contra e.o. e derecho di libertad di expresion cu ta ancra den nos Constitucion. Esaki ta significa cu e decreto ministerial y e otro decreto cu DTZ ta referi na dje ta nulo y no ta mara ningun persona (“onverbindend”), ni e doñonan di radio emisoranan na Aruba.
Ademas loke ta hopi importante pa trece padilanti ta cu e leynan cu e director di DTZ ta referi na dje ta data di aña 1991, sinembargo tin hurisprudencia di e.o. aña 2000 bin ariba di Corte Europeo referente e derechonan humano caminda a determina cu no por sin mas restringi e derecho y libertad di partidonan politico pa expresa nan opinion.
Na final di dia kico lo ta di un democracia si un politico no por tin e derecho di expresa su opinion na radio y television di kico e ta para pe, kico e ta pensa di e problemanan y retonan cu e pais tin y kico ta su pensamento como politico ta pa soluciona e problemanan cu ta reinando den e Pais, y vocifera esaki pa Pueblo por evalua pa ken e lo por deposita su voto den e proximo eleccion.