Logra un bon CAO na un time-share resort no ta facil

0

Paradise Beach Villas y STA a firma un contracto colectivo pa cual Sr. Diego de Cuba, lider di sindicato STA ta bisa cu esaki ta e di dos contracto colectivo firma.
El a gradici gerencia di Paradise Beach Villas y tambe e delegadonan, Roland y Amado. E tabata un negociacion di un poco mas di tres luna, pero manera Sr. Freddy Albertus a bisa ya caba, cu e negociacionnan a bay den bon ambiente.
Den e contracto colectivo aki e trahadonan di Paradise Beach Villas por ta contento, ya cu nan ta conoce adelanto den practicamente tur aspecto. A pesar cu tur hende sa cu situacion na Aruba no ta mucho di canta macamba, pero gerencia di Paradise Beach Villas sa cu si trata e trahadonan bon, esakinan lo duna di nan parti tambe.
Ta bay tin un fenomeno nobo, cu ta 26 dia extra liber pa aña y den concepto di Sindicato, esaki ta un adelanto basta formal, ya cu tin hopi resort cu ainda no por disfruta di esaki. Ta gradici gerencia pa e comprension cu nan a mustra pa esey. Apart di e bonus di fin di aña lo conoce un aumento, dependiendo di loke ta nan performance, ya cu e ta mara na e trahadonan, di con nan ta eherce nan labornan, den e aña laboral. Ta haya situacionnan tin ora di ziektemelding, cu no ta a causa di bo mes, p.e. un accidente, tur e cosnan ey ta tene cuenta cun’e. Pero si coy e contracto colectivo den su totalidad, e trahadonan lo conoce un aumento general tambe, dus mester bisa cu e CAO, segun Sr. Diego de Cuba, tin tur e ingredientenan cu’n bon CAO tin.
Tempo cu a cera e prome CAO a traha e fundeshi y aworakinan ta sigui ‘bouw op’ ariba dje. Semper STA a bisa cu nan no kier keda na un ‘break- even point’ ora di negocia un contracto colectivo nobo, pero semper nan kier progresa y esaki nan kier cu e contracto aki.
Mas aleu, Sr. Diego de Cuba, lider di STA, ta contento cu e resultado aki. Y algo cu ta hopi importante, ta cu ta duna realse na nos idioma papiamento, e contracto colectivo ta wordo firma den nos idioma Papiamento y esaki t alocual cu sindicato STA lo bay haci den futuro cu tur nan contracto colectivo cu nan lo firma. Ta di hopi importancia pa mantene e lenga materno bibo, ariba nos pais Aruba. SI mira loke ta pasando ultimamente y cuanto lenguahe rond mundo a bay perdi, ta deber di sindicalistanan y hendenan responsabel, pa mantene esaki bibo.
STA ta contento cu gerencia a bay di acuerdo cu esaki, cu ta firma e contracto na Ingles y Papiamento.
Esaki ta importante, ya cu e mundo ta bay cambiando. A drenta e era cibernetico y ta haya cu hopi retonan dilanti y exigencianan cu ta bisa cu no tabata spera cu nan lo exigi esey, di parti di clientenan mes. E ora ey, e resort mester ta prepara pa e por gara eseynan tambe y traha ariba dje. E cliente ta rey, y den e caso aki, no ta diferente. E cambionan cu tin y STA ta wak e cambionan a base diario, cu ta tuma luga den e mundo electronico. Y e parti social tambe, manera ya menciona, e hendenan ta preocupa hopi cun’e. Y un bentaha cu tin aki na Paradise Beach Villas, ta e trato cu e hendenan ta haya cualt a haci cu e hendenan ta contento di bolbe akinan, segun Sr. Diego de Cuba, lider di sindicato STA a finalisa bisando.

Comments

comments