Lockdown suave di 10 dia na Boneiro

Kralendijk Boneiro: Diasabra pasa di 6or aturdi durante conferencia di prensa na Boneiro e Gezaarhebber a anuncia un lockdown cu ta cuminsa dia 21 September pa 12or anochi te cu 30 September pa 10 dia tin lockdown, debi cu a conoce 16 caso. Scol y construccion so mag di keda habri. Esaki ta debi cu a pone Boneiro na codigo Oraño.

Aki e comunicado di Boneiro:

Kerido siudadanonan, awe mainta nos a anunsiá e sifranan mas resien. Awe, djasabra 19 di sèptèmber a identifiká un total di 16 kaso nobo di kontagio na Boneiru. Un djis dòkter Marian Luinstra-Passchier di Salubridat Publiko lo bai mas den detaye di e sifranan.

Ounke mayoria di e kontagionan ta trata di keho leve, esaki ta nifiká ku nos a drenta un fase nobo ku mester tuma medida mas estrikto.

Esaki pa evitá ku e vírùs ta sigui plama riba nos isla.

Tur e medidanan ta drenta na vigor djadumingu awor 12or di mardugá, i ta trata di un vershon suave di un lockdown.

E medidanan ta bálido pa 10 dia, pues te ku 30 di sèptèmber.

Kiko ta e medidanan:
-​Punto di salida ta keda: keda kas mas tantu posibel.
-​Stimulá traha for di kas mas tantu posibel.
-​Sektor di konstrukshon por keda funshoná.
-​Ta sera tur establesimentu di kome i bebe. Hiba òf “takeaway” si ta posibel te maksimal 8or di anochi.
-​Ta sera tur establesimentu ku ta ehersé asina yamá trabou òf servisio di kontakto riba tereno di kuido di aparensia (por pensa riba pelukero, estilista di uña etc.)
-​ Ta sera tur fasilidat/skol di deporte. Ta permití deporte den aire liber ku poko kontakto, sin públiko.
-​Ta sera tur casino.
-​Ta permití entiero ku maksimal 10 persona den sala di despedida.
-​Ta permití seremonia di matrimonio na registro sivil sin invitado.
-​Akohida pa hende grandi por keda habrí pero ku indikashon/direkshon/guia di Salubridat Públiko.
-​Ta sera tur tienda, kompania i instituto ku eksepshon di: sektornan vital manera kuido (tambe “mantelzorg”), gobièrnu, instituto finansiero, organisashon manera Selibon, BIA i WEB.
-​No opstante botika, supermerkado, pòmp di gasolin i tienda di material di konstrukshon si ta keda habrí te maksimal 8or di anochi. Ta pidi bishitante pa kumpli ku e maneho di porta i kapasidat máksimo di e tienda.
-​Skol i akohida pa mucha ta keda habrí, bou di kondishon estrikto di Salubridat Públiko. Si tin hende ku ta tèst positivo lo tuma e medidanan nesesario pa evitá kontagio.
-​Ta permití aktividat religioso ku maksimal di 10 persona.
-​Ta kanselá tur evenemento (ku ta rekerí un pèrmit di APK) i reunion, ku eksepshon di reunion den kuadro di konsulta di krísis. Enkuentronan por konsistí di maksimal 10 persona.
-​Mi a entregá un petishon pa hasi Boneiru un destinashon ku kódigo oraño. Si asigná esaki, ainda ta permití vuelonan for di Hulanda, pero ta konsehá pa solamente hasi biahenan nesesario.
-​Vuelo interinsular ta permanesé manera nan tabata: solamente pa repatriante i profeshon esensial.

Esakinan ta media fuerte pa e 10 dianan binidero. Pero nan ta importante pa sòru pa e vírùs tin un chèns minimal pa sigui plama. P’esei mi ta hasi un yamada na tur abitante di Boneiru, paso si nos dal un stap patras awor, pronto nos por suavisá e medidanan atrobe.

Mi no por ripití sufisiente, e manera mas efektivo pa limitá e vírùs aki ta: Tene 1,5 meter di distansia, laba bo man i keda kas mas tantu posibel.

Por haña tur informashon aktual riba: www.bonairecrisis.com i tur otro fuente di gobiernu.

Comments

comments