Comision di NVnan di gobierno a reuni cu Prome Minister, cual tabata e prome reunion di e comision, cu Sr. Edgard Vrolijk, parlamentario di partido MEP, ta presidi. E reunion tabata tocante e cantidad di placa cu WEB a malgasta bou di gobernacion di partido AVP.
A trata diferente topiconan, e.o. E supuesto carta cu Sr. Sneek ta referi na dje tur ora, tocante e aumento di prijsnan. Y un di e topiconan pisa cu nan a topa, ta e cantidad di placa cu a wordo malgasta durante gobernacion di Sr. Mike Eman. Un di e nan ta e 17miyon, cu ta cla pa wordo afgeschreven. Esaki, na opinion di Sr. Vrolijk, e suma aki no mester wordo afgeschreven, pero cu mester tuma pasonan huridico. Ta trata di un incumplimento di un contract, Sr. Edgard Vrolijk. A gasta 17 miyon sin haya nada a cambio. Prome Minister tabata di acuerdo y a bay di acuerdo pa tuma pasonan huridico. Y Parlamento ta para firme pa esey. No por malgasta placa di pueblo.
A papia tambe di e Flying Wheel cu ta 29 miyon y e compania Canades aki a bati bancarota. Mester tin un hende cu ta para responsabel pa esaki. Baterianan cu a wordo cumpra malo, cu tambe a costa algun miyon. Tin tambe e Getaway, y tin hopi cos cu not a comproba y awendia pueblo ta mal pega cun’e. No ta pueblo of trahado di WEB mester paga. Pero esun cu a firma e contract. Un hende tin cu carga e culpa. Ta puebloi ta paga y ta di lamenta.
Un otro topico tabata e placa malgasta na consultancy. WEB NV so a core den 8 aña den 6 miyon na consultancy. Utilities 4 pa 5 miyon florin. Tambe NV Elmar tin casi 7 miyon paga na consultancy. Por papia di mas di 46 miyon den tres NV na consultancy. Esaki a para bira un wega.
Ainda pa loke ta Sr. Richard Arends, parlamento no sa den ki concepto e tabata ta. Sr. Arends tabata consehero di gobierno, den un periodo el a cobra 442 mil florin. Ariba esey el a bay Utilities el a cobra 574 mil florin den un periodo cortico. Eynan Utilities a gasta 4.4 miyon florin. Y den un periodo di menos di 2 aña. Sin conta tur e Green Conference, a paga Al Gore a paga 160 mil florin, pe bin papia un rato. Ainda no a haya contesta di tur e gastonan di avion priva, etc. pa Richard Branson, ya cu parce niun hende no sa di dje. Cableman a escala asina hopi placa. Den RDA tambe Sr. Richard Arends a cobra placa di akinan. Y tambe ta wardando confirmacion di pregunta haci, unda Sr. Arends lo a cobra placa ariba su nomber.
Unabes cu haya confirmacion contra Sr. Richard Arends, no lo keda nada otro di tuma pasonan legal tambe contra di dje, ya cu e ta enrikicemento y abuso di placa di pueblo. Pa habri refineria a gasta 700 mil florin na Destra. Tabata tin mal gastamento cu por a wordo uza pa baha awa y coriente pa pueblo.
Keto bay parlamento ta bringando cu gobierno, ya cu nan ta contra subimento di prijs di awa y coriente, a pesar di cu prijsnan ta subiendo internacionalmente. Parlamento lo bay pone presion y Sr. Vrolijk, como presidente di Comision, lo bay wak kico ta haci, ya cu tin un contract cu no a cumpli cun’e, dus esey tin cu paga bek. Ta basta cu malgastamento di placa di pueblo, sin haya nada bek a cambio. Como Parlamento, kier trece cambio, y esaki ta forma parti di e cambio. Parlamento no ta goberna e pais, pero si tin e poder pa exigi e minister pa cumpli cu esey tambe, segun Sr. Edgard Vrolijk, presidente di Comision di NVnan di gobierno.
