Dialuna mainta, durante un conferencia di prensa, yama pa Minister di Asuntonan Economico y Comunicacion, a anuncia un decision importante tuma pa su ministerio. E decision ta encera introduccion di un moratorio riba establecimento di negoshi di ‘Levensmiddelen’ (super- y minimarket).
Minister mr. drs. Richard Arends, den e conferencia di prensa a splica cu for di momento cu el a tuma e encargo di Minister di Asuntonan Economico, e topico aki tabata uno cu el a duna hopi atencion. El a laga haci un estudio basta detaya y Departamento di Asuntonan Economico a haci un plot na unda por mira e concentracion di supermercadonan.
“Awendia nos tin 185 levensmiddelenzaken cu ta supermarket, mini-market y convenience store cu ta concentra mayoria di biaha unda cu tin mas hende ta biba. Si mira e cantidad di supermercado, con esaki a aumenta redoblando den ultimo 5 añanan, mi mester bisa cu Ministerio di Asuntonan Economico durante e 5 añanan aki a sostene actividadnan economico, a crea menos obstaculo posibel y por mira cu den tur sector tabatin crecemento, cu e meta pa promove mas actividad economico. Den caso specifico di supermercadonan, por mira un redoblacion, mientras cu e poblacion di Aruba a keda mas o menos constant den e ultimo 5 añanan.”
El a splica cu a haci un analisis riba e cantidad di supermercado pa cada habitante y a compar’e esaki cu e situacion na p.e. Merca. E resultado ta mustra cu na Merca tin 0.20 supermercado pa cada 1000 habitante y na Aruba e ta 1.78 supermercado pa cada 1000 habitante. Aunke cu en realidad no por haci un comparacion, como cu e tipo di establecimentonan aki cu lo cay bou categoria di supermercado ta diferente, e ta duna si un idea di e magnitud di diferencia cu tin cu Aruba, cu ta un diferencia basta grandi.
Pa loke ta cantidad di supermercado pa km2, por mira cu na Hulanda e ta un ratio di 0.23 y na Aruba e ta 1.03 supermercado, casi 1 supermercado pa cada km2 na Aruba. No obstante, Hulanda tin rekisitonan hopi severo riba cuanto area mester ta sector frieu, berdura, su grandura, kico e omzet mester ta. “Aunke no por compar’e di 1 riba 1, bo por mira cu tin un diferencia substancial entre Aruba y Hulanda. Si exclui Parke Nacional Arikok ya caba ta yega na 1.3 supermercado pa cada km2. A base di esaki di esaki y den consulta cu Departamento di Asuntonan Economico, a dicidi cu entrante diamars (23 di mei, 2017) ta cuminsa un moratorio riba supermercadonan pa e proximo 2 añanan. E departamento lo no duna vestigingsvergunning pa e tipo di e negoshinan aki mas. Tur peticion cu a wordo entrega caba na Departamento Di Asunto Economico ta wordo trata,” e mandatario a informa. Detaye y reglanan specifico ta obtenibel na dicho departamento.