Diadomingo, minister di Asuntonan Social y di Labor, Sr. Glenbert Croes a sali di biahe pa Hulanda, den un delegacion hunto cu minister di Finanzas y minister di Husticia. Sr. Glenbert Croes ta amplia.
E mision di e biahe aki ta pa termina di informa e gobierno di Hulanda, un apreciacion di e problemanan grave cu tin na Aruba. Sr. Croes, den su calidad di minister di Asuntonan Social y Labor, lo informa Hulanda di e crisis situacion cu Aruba ta pasando aden y e consecuencianan pa henter nos comunidad y nos pueblo.
Cada ministerio lo duna nan informacion for di nan angulo. E speransa ta cu nan lo haya e comprension y cooperacion di e gobierno di Hulanda, y asina den conhunto busca un solucion. Na momento cu como pais, ta keda kere cu hopi confianza den e convivencia den Reino Hulandes, Aruba a kies cu den momentonan dificil, e paisnan lo para pa otro y yuda otro, coopera cu otro y duna otro un man. Na e momentonan aki, Aruba mester di e apoyo di gobierno di Hulanda, y ta bay den tur humildad y serenidad splica un situacion cu ta un realidad amargo pa nos na Aruba, segun Sr. Glenbert Croes. No ta su intencion di punta dede ariba e gobierno anterior, di AVP. Pero e realidad ta cu, e desaster y desgracia financiero y social, cu tin na Aruba, lamentablemente ta danki na e politica di e gobierno di Mike Eman y AVP.
Den apenas 120 dia den gobierno, e gabinete aki a atende cu emergencianan inigualabel den historia di nos pais, na nivel social y financiero. Tin problemanan cu ta menasa e existencia y e derecho di existencia di Aruba como pais. Y esey ta algo sumamente grave pa gabinete Wever-Croes. P’esey mes, un delegacion a sali pa Hulanda, pa cumpli cu nan mision encomenda na nan, door di e Minister Presidente, Sra. Evelyn Wever- Croes. E delegacion ta bay cu speransa grandi, cu argumentonan, e taxatie social, e realidad di e situacion social di nos pais. Pero hunto cun’e, not a bay presenta solamente problema, pero tambe plannan di solucion cu ta trahando ariba dje na Aruba.
E plannan di emergencia cu a wordo aproba den conseho di minister di Aruba, unda cu ta exigi un inversion di 50 miyon florin. Y gobierno a bisa, no obstante e desgracia financiero, ya caba, gobiernoa cuminsa pone 34 miyon florin. Y Sr. Croes y e delegacion ta bay Hulanda cu e speransa di haya e cooperacion y apoyo di nos pais ruman, Hulanda pa nan para schouder cu schouder cu otro, den un momento dificil, cu Aruba ta pasando aden. Asina Sr. Glenbert Croes, minister di Asuntonan Social y Labor a finaliza bisando.