Minister a yama un conferencia di Prensa conhuntamente cu Dutch Caribbean Nature
Alliance (DCNA) y Fundacion Parke Nacional Arikok (FPNA) unda cu a trata e diferente
preparacionnan cu tin den cuadro di e bestuur nobo di Fundacion Parke Nacional Arikok
y e trabou estrecho cu lo bay tuma luga den futuro cu sosten di DCNA, tambe Minister
Oduber a splica di e posibilidad di intercambio cu lo bay tuma luga ora cu tin e
colaboracion di tin un Parke Marino bou di FPNA.
Den cuadro di e esfuersonan aki pa preservacion di nos naturalesa y bienestar di nos medio ambiente, Minister Oduber a haci un anuncio sumamente importante, pa cual a anuncia prohibicion di articulonan cu ta dañino pa nos medio ambiente.
Gobierno dia 20 di augustus a dirigi un carta pa presidente di Parlamento di Aruba den cual cu a notifica Parlamento cu Gobierno tin e intencion pa prome di januari venidero pone un
prohibicion (ban) na uzo di productonan sunblock y/of suntan cu ta contene Oxybenzone.
Oxybenzone ta un di e ingredientenan principal cu ta comproba na e momentonan aki pa ta
sumamente dañino pa coral y bida marino. ‘Como comunidad nos mester por ta consciente di e daño cu ta wordo causa ora cu nos tin gran cantidad di turista anualmente cu ta uza e tipo di cremanan aki. Aruba ta tuma un paso dilanti na e momentonan aki pa tuma un decision den cuadro di proteccion di nos medio ambiente.
E decision aki a pasa den Conseho di Minister conhuntamente cu un prohibicion cu ta drenta na vigor desde prome di januari pa loke ta trata tur materialnan di ‘foam box’ y ‘single use plastics’ manera cups di plastic straw etc’. Lo duna comunidad 1 aña como ‘overgangsfase’
Esaki kiermen cu ora cu haci e anuncio oficial 1 januari 2019, esaki lo significa cu pa 1
januari 2020 esaki lo ta completamente prohibi akinan na Aruba. E prohibicionnan aki ta
particularmente pa garantisa cuido di nos medio ambiente poniendo Aruba riba mapa
internacional di ta cumpli cu e deseo cu hopi biaha tin di decisionnan cu mester wordo tuma pa proteha nos medio ambiente.