E personanan cu a opta pa haya e vacuna Phizer pa protege nan mes di e sintomanan severo di coronavirus “probablemente” lo mester haya un di tres dosis di refuerso den 12 luna di tempo despues di e vacunacion completo.
Esaki ta loke cu Albert Bourla, director ehecutivo di Pfizer, a bisa durante un entrevista cu e cadena di television CNBC.
E farmaceuticonan Pfizer-BioNTech a informa na februari cu nan ta test un di tres dosis di nan vacuna contra COVID-19 pa comprende miho e reaccion immuun contra e variantenan nobo di e virus. E dosis extra lo ta beneficioso pa enfrenta e variantenan di coronavirus existente y esnan cu por surgi den futuro.
E vacuna di Pfizer tabata e prome pa ricibi aprobacion di uzo di emergencia na Merca di parti di FDA.
E farmaceuticonan Pfizer y BioNTech a informa recientemente cu nan vacuna contra COVID-19 ta sigui ta sumamente efectivo durante al menos seis luna despues di a haya e di dos dosis y cu ademas e ta funciona contra e variante Surafricano.
Segun e companianan, e vacuna a mustra un efectividad di 91.3% contra COVID-19 te cu seis luna despues di a ricibi e di dos dosis y un efectividad di 100% na momento di preveni casonan severo, segun specificacionnan di Centronan pa Control y Prevencion di Malesanan (CDC pa su abreviacionnan na Ingles).