E aña aki e fundacion tin mas mucha cu nunca, mirando e edad di e muchanan cu mester di un famia pa cual aki Sra. Nathalie Marjorie Tromp di Centro di Famia di Criansa Arubano ta splica.
E muchanan nan edad ta varia entre 0 pa 6 aña. Sra. Tromp no por bisa si e ta un preocupacion, pero den nan caso, den e trabao cu nan ta haci, lo bo kier brinda e muchanan un miho bienestar, lo kier brindanan un miho desaroyo. Esey nan no ta haya den un internado, tur esten cu e mayornan ta regla nan situacion. Tin mayor ta haci uzo di e oportunidad pa asina nan traha ariba nan mes, pa asina e muchanan bin bek. Pero tin mayor cu door di situacion, no ta logra y e ora nan ta contento y nan ta aprecia famianan di criansa cu ta habri pa keda cu e muchanan den nan cas.
Sra. Nathalie Marjorie Tromp a splica cu tur muchanan tin nan AZV, y muchanan den internado cu ta ilegal, pero ora cu nan ta cay bou di Fundacion Guiami, e ora e fundacion ta traha ariba e status di e muchanan y mientras esey ta den proceso nan ta busca seguro pa e muchanan. Tambe ora cu un mucha ta na famia di criansa, algo pasa cu e mucha mester bay dokter, e ora e instancia ta core cu e gastonan di dokter.
Un mucha cu keda den un internado, no ta bon pe. E ora ta busca un famia di criansa e ora, cu e mucha por keda den weekend of full time. Pero tin biaha situacion di mayor no ta mehora. E ora e muchanan por sigui keda biba cerca e famia di criansa. Pero ora cu e situacion di e mayor mehora, e ora e mucha ta bay bek na su mayor. E famia ta wordo poni na altura di tur e pasonan aki. E famia di criansa ta na altura di dje, cu e no ta cay manera sorpresa. Y di principio ta bisa e muchanan cu cuido di criansa no ta adopcion, pero e ta un cuido boluntario. Ta brinda e mucha un hogar, tin ora e ta temporal, tin ora e ta pa semper.
Locual cu Fundacion Famia di Criansa ta busca ta un famia cu ta compronde cu e ta bay haya un mucha cu no ta su propio yiu. Esaki ta un mucha cu a pasa den experencianan malo, e ta un mucha cu ta haya falta di su mayor. E ta un mucha cu ta haya falta di su cosnan cu ta conoci pe. Y e ta un mucha cu tin dolor. Dus e mucha ta bay bin den bo cas y e mester un hende cu kier consol’e, e tin mester di un hende cu ta willing pa compronde y e ta un persona cu ta willing pa sigui dune guia tanten cu e mucha mester di mucha.
Hopi famia ta acudi na Centro Famia di Criansa y ta bisa cu nan no kier muchanan cu mal comportacion. Pero mester compronde esakinan ta muchanan cu ta bin di un ambiente unda cu nan mester a sobrevivi. Nan ta bini cu un comportacion cu nan tabata tin na cas pa nan a sobrevivi. Y e comportacion eynan, abo nan no conocebo. E comportacion ey, ora den bo cas, ta bin laira. Nan ta sinti cu nan mester defende nan mes.
E famia e ora mester mustra e mucha cu, “hey, bo por confiami”. Ta e famia mester gana e mucha su confianza. Hopi hende ta kere cu ora cu e mucha bay cerca un famia di criansa, e ta bay ta contento. Dimes, paso e mucha porfin ta haya un tanchi of un ompi. Tin mucha cu ta prefera di ta na nan mayor. E famia mester gana nan confianza. Y esey Centro Famia di Criansa ta buscando, famianan cu ta dispuesto pa haci e esfuerso pa gana cariño di un mucha, segun Sra. Nathalie Marjorie Tromp.