Lo investiga posibel malversacion di fondonan di FMAA

Durante e reunion cu sindicatonan, minister Dangui Oduber a bisa cu lo bay cuminsa un investigacion pa wak kico tur a wordo haci cu tur e fondo den su totalidad, di 9 miyon florin disponibel pa tratamento di adiccion. Pero ora di tende kehonan cu ta wordo trece dilanti cu no tin placa pa cumpra pen, potlood, borchi, y tampoco actividad pa e personanan cu ta den e centro, e ora mester puntra kico a pasa cu e placa.

Tin un situacion basta fastioso, di un compania di siguridad liga na ex minister Douwers, cu a haya un contracto lucrativo di 600 mil florin. E compania aki no a wordo paga, nan tin un caso den corte contra di gobierno. Nan a claim e 600 mil florin. Es decir, tin un disputa pa wak kico ta wordo haci, y logicamente e trahadonan tabata kier claridad kico lo pasa cu nan futuro di FMAA y a bisa nan cu gobierno tin diferente opcion cu nan ta evaluando ki direccion nan ta bay. Pero ta garantisa nan, y lo bay demostra esakinan cu decisionnan concreto, cu nan lo sinti e cambio, cu lo bin un cambio di maneho. Lo duna atencion no solamente na e maneho di FMAA, empleadonan di FMMA, pero logicamente na e personanan cu mas mester di ayudo.

Loke ta pasa den e zorgketen ta cu hopi hende a wordo politicamente nombra y sin e experticio y conocemento pa atende e personanan cu tin problema di adiccion. E personanan aki cu a wordo politicamente nombra, di cual varios nomber a wordo menciona, ta personanan cu a wordo politicamente nombra prome cu eleccion. Lo bay haci un investigacion ariba no solamente e parti financiero, di kico a wordo haci cu fondonan cu pa medio di Land Aruba ta wordo duna na FMAA, y Bureau Ondersteuning Verslavignszorg.

Actualmente tin personanan den nachtdienst di un persona, 5 pa 6 biaha pa siman. Ta circunstancianan inhumano cu e trahadonan ta pasando aden. Y tur esaki tin di haber cu e maneho interno di e dienst, y p’esey nan a expresa nan disgusto contra e director  actual. Gobierno sa caba kico nan ta  bay haci, kico ta e decisionnan cu nan ta bay tuma.

E mandatario a pidi e trahadonan pa dun’e e beneficio di duda, y cu decision- y accionnan concreto pa nan sinti e cambio den e maneho y den e manera cu ta trata cu personanan cu mas mester di ayudo.

 

 

Comments

comments