Minister di Enseñansa, Michelle Hooyboer-Winklaar hunto cu Fundacion Autismo Aruba a organisa un charla pa maestronan relaciona cu e topico “Autismo” durante luna di Enseñansa. Ta importante pa tur maestro sa kico nan por haci ora cu nan tin un alumno autista den nan klas. Tin biaha tin mas cu un studiante autista y mirando cu autismo tin un “spectrum” grandi, hopi biaha e maestronan ta wordo enfrenta cu diferente tipo di autismo, e mandatario a indica.
E maestronan mester por sa kico nan por haci den casonan asina y por profundisa riba cierto temanan y saca lo maximo for di dje. Esey tabata e meta di e charla aki. Facilita e maestronan di diferente scol cu e informacion aki cu lo por yuda nan.
Banda di esaki a traha un buki cu ta un traduccion di un “toolkit” cu ya caba tabata existi na Merca cu a wordo traha specificamente riba e topico di enseñansa y aspectonan cu diariamente nan lo por topa cun’e y con lo por surpasa e retonan cu ta existi, Minister Hooyboer-Winklaar a señala. E meta principal ta pa yuda tur mucha, a pesar di e reto of dificultad cu nan tin. Tin un manera pa yega na nan y saca lo maximo for di cada studiante, el a enfatisa.
Un di e expertonan presente e anochi aki tabata e Logopedista Giselle van Grieken. El a duna di conoce cu nan a wordo acerca door di Minister di Enseñansa pa por presenta un tayer pa docentenan. Nan tin un “toolkit” cu maestronan por uza na scol cu tecnica hopi practico pa uza den klas. E “toolkit” a bin di Merca for di “Autism Speaks” y Minister a laga traduci esaki na Hulandes pa scolnan na Aruba por uz’e. Pa por uza e buki aki no ta djis habri’e. Mester haya un guia pa aplica e “toolkit”, van Grieken a indica.
Den cuadro di esey, Minister di Enseñansa a acerk’e, parti e bukinan pa e scolnan y cuminsa introduci e topiconan cu tin den e buki. Ademas a probecha pa anuncia e evento grandi cu ta organisando pa April 2017.
Durante e evento aki lo tin dos analista di comportacion cu ta bin for di Merca cu ta bay duna un tayer hopi intensivo un siman largo pa enseñansa special, kleuterskool y enseñansa primario. E dos personanan aki ta bay siña e maestronan con pa por aplica locual tin den e “toolkit” den nan bida diario den un klas, e experto a duna di conoce. Den cuadro di esey a cuminsa parti e bukinan y papia riba algun di e topiconan locual e maestronan por cuminsa practica den nan klas wardando April yega, a agrega.
E reaccion di e maestronan tabata positivo pasobra awendia ta topando e alumnonan autista mas y mas den enseñansa. “Si e mucha no ta siña e manera cu nos ta siñ’e, nos tin cu siña e mucha e manera cu e ta siña”, asina van Grieken a termina bisando.