Arubaanse Voetbalbond (AVB) ta preparando hunto cu tur ekipo di futbol cu ta dispone di un team femenino of ta dispuesto pa lanta un ekipo asina, pa un tremendo Women’s Soccer Expo. E evento ta tuma luga diadomingo 20 di November na Renaissance Convention Center for di 11:30am pa 6:00pm. Presidente di AVB, Richard Dijkboff ta extende un invitacion pa tur esunnan interesa den futbol femenino pa marca e fecha den nan kalender y haya sa mas tocante di futbol femenino na Aruba.
E exposicion ta e culminacion di un campaña pa promove e crecemento di futbol femenino cu a cuminsa na juli ultimo. E region di Caribe ta conociendo crecemento di e segmento aki di futbol y Aruba tambe kier mir’e crece aki. Prome cu e exposicion AVB lo bishita scolnan cu presentacionnan, cu colaboracion di Minister di enseñansa, den un esfuerso pa conscientisa mucha muhenan hoben pa bishita e evento cu nan famia y registra cu e team cu ta mas atractivo pa nan.
“Ta importante pa hunto nos traha na crecemento di e segmento aki den nos deporte di futbol. Scolnan hopi bes ta lanta ekiponan di futbol pa mucha muhe, pero pa un of otro motibo no ta promove e muchanan aki pa sigui un carera den e deporte. Nos kier pa nan sa, cu separa di hunga futbol den pauze na scol, cu nan por practica e deporte aki na nivel profesional tambe den un ekipo cerca di nan cas”, asina Richard Dijkhoff a enfatisa.
Entrada pa e exposicion ta gratis y registracion ta habri pa tur esunnan interesa den uni na cualkier un di e teamnan cu ta participa na e evento.