Ta conoci cu na Aruba tin scarsedad di tereno y cu e poblacion di Aruba a crece durante e ultimo añanan, Sr. Otmar Oduber, minister di Infrastructra, ta elabora e ultimo desaroyonan ariba e tereno aki.
Tin un demanda pa casnan social na Aruba y no solamente casnan social, pero tambe casnan cu ta pagabel den e caso aki, Sr. Oduber a cuminsa combersa cu FCCA ariba e tema aki. Ministerio di Infrastructura ta preparando loke pa ley, FCCA mester sigui como stichting, a traves di un mandato di gobierno door di un protocol, cual Sr. Oduber lo spera di keda cun’e den e proximo simannan.
Lo establece cuanto vivienda minimal cu lo mester wordo produci y cuanto tereno mester wordo otorga, cuanto di nan ta casnan social. Den futuro no lo papia mas di casnan social, pero di casnan popular. Lo kier atende tambe cu gruponan di persona mas grandi den nos comunidad, pensionadonan, cu tambe por traha un cas social, pero mas dirigi ariba e edad cu nan tin. Pero tambe pa famianan cu tin un handicap por haya un hogar, p’esey ta yamanan casnan popular cu ta wordo crea. Pa esaki mester percura pa tin tereno pa duna FCCA, y subsidio di parti gobierno pa e parti aki. Tur esaki ta wordo prepara den un maneho na e momentonan aki, y pa fin di Januari lo por anuncia esakinan.
Mas aleu, Sr. Otmar Oduber, minister di Infrastructura, a sigui bisa cu entre fin di Januari y Februari, e plan di maneho lo mester keda cla, e asina yama ‘roadmap’ unda cu e intencion ta cu di awo caba, unda por lo menos 200 cas social mester wordo traha pa aña den e plan cu tin actualmente, mas 200 casnan pagabel pa e comunidad di Aruba, mirando cu FCCA tin un cantidad di tereno eigendom, cu ta mucho caro por traha casnan social. Pero si casnan pagabel, ya cu semper tabata tin un diferencia entre casnan social cu ta wordo traha y casnan comercial cu ta wordo traha door di sector priva, cu semper ta casnan di riba 300 mil florin. E intencion ta pa gobierno lo bay stimula pa traha casnan pagabel, cu no mester ta social, cu no mester ta subsidia, cu parehanan jong cu ta termina estudionan of mamanan soltero cu tin bon trabao, cu por tin bon entrada cu tin nan propio cas, na un bon prijs cu nan por carga como famia