Tambe den e proyecto aki lo trece cambio cu ta bay te banda di hotelnan pa cual Sr. Marlon Croes a splica mas di e cambionan cu lo bay conoce den e ppp Watty Vos Blvd.
Un parti di Irausquin Blv, for di Dutch Village te cu Riu Antillas, full e caminda aki lo wordo embeyece y ta forma parti di e Linear Park 4 y 5. E ta pa haci e area aki mas bunita y mas atractivo pa nos peatonnan y ciclistanan por enjoy e parti aki.
E parti di L.G. Smith Blv, loke den boca di pueblo ta conoci como Sasakiweg, for di Punta Brabo te cu crusada di Superfood y for di Superfood e lo bay bek den Irausquin Blv. E puntanan di Superfood lo wordo comberti den rotonde, e punta cu ta bay pa Hospital tambe lo wordo comberti den rotonde. Asina lo aumenta e siguridad den trafico y alabes mantene e capacidad. Esaki ta e loke e proyecto ta encera den su totalidad. Y a cuminsa cu e trabaonan, diabierna y diasabra, unda cu hopi matanan a wordo corta y naturalmente esaki ta haci dolor ora ta wak matanan ta wordo corta, pero e mata ta wordo corta pa loke a splica anteriormente, dus pa tin un miho fluho di trafico rond di Aruba, y brinda e miho posibilidadnan pa un desaroyo economico. Tambe ta pa baha e filanan cu tin rond di Aruba.
Sr. Marlon Croes a sigui splica cu den e proyecto nan a haci un estudio ambiental, unda cu e identifica tur e areanan, full e trayectoria kico tin na mata, kico tin na vegetacion y fauna, pa asina por sa precies prome cu cuminsa trhaa eynan, ki medida mester wordo tuma. A acerca Direktie Natuur en Milieu como tambe DLVV (Directie Landbouw, Veeteelt en Vissery) pa ta hunto cu nan pa monitorea full e proyecto aki hunto cu MOTA. naturalmente lo inclui segun e progreso di e trabao, NGO’s tambe acerca, pa nan ta participa den e proceso pa nan yuda wak cu ta cuida e medio ambiente.
E no ta bay pa solamente, pa corta mata, pero tin un meta mas grandi y naturalmente den e proyecto ta encera cu ta planta mata tambe y lo restaura mata algun caminda. P.e. e stretch di Irausquin Blv for di Dutch Village te cu Riu Antillas lo wordo embeyece por completo, unda cu matanan lo wordo planta. E islanan (di e rotonde) lo wordo embeyece cu matanan.
Tur e partinan delicado, lo percura pa tin e plan di restauracion completo, pa asina mitiga tur e riesgonan cu e proyecto ta encera. E top soil di tur e rosamento, e ta gordura cu ta valioso y a consulta cu MOTA over di esaki y e la comunica na DOW cu den e plan di landscaping cu e ta bay haci, e lo uza e topsoil aki bek. E lo ward’e y ora cu e cuminsa cu e landscaping e lo pone bek na e luga, unda cu e mester ta.
Tambe e matanan cu ta wordo corta, DOW ta purbando di hiba un maneho mas duradero y sostenibel. Esey kiermen cu DOW ta bezig cu tur e vegetacion cu tin cu ta wordo separa, ta wordo hiba Barcadera unda lo verchip e y comberti esaki bek den mulch, unda cu lo uza esaki como compost.
E tronco di e matanan cu ta keda afo tambe lo wordo hiba Barcadera, unda tin un registro pa nos artesanonan local, si nan kier por bin pidi esaki pa nan traha artesania. Conhuntamente cu Sta. Rosa, lo wordo papia pa monitorea, pero Sta. Rosa lo kier un rol mas activo den esaki. Nan lo papia cu e contratista, unda cu si nan lo por supply e contratista cu e matanan pa cu e proyecto aki, segun Sr. Marlon Croes, director di DOW.