Hefe di Departamento di Prevension, sr. Ferdinand Ponson, ta comenta cu dam di Moko mester wordo tapa cu santo sino lo cuminsa parti multa.
Sr. Ponson ta splica cu den e ultimo dianan nan ta hayando hopi yamada di bisiñanan banda pabou di e dam unda e huma ta bay. For di dia cu e dam ey a cende na candela, nan a papia cu e persona cu ta maneha parti di e tereno aki y el a manda basha tera riba esaki. Nan a habri un caminda parti pazuid pa trucknan por a drenta y basha e tera. Den e ultimo dianan aki, nan a ripara cu e huma a cuminsa lanta bek.
E departamento a reuni cu Departamento di Naturalesa y Medio Ambiente, DOW, Polis di Bario y City Inspector y a yega na e acuerdo pa cuminsa basha tera mas pronto cu ta posibel p’asina caba di extingui e candela completamente. Sr. Ponson ta enfatisa cu ley ta prohibi pa benta sushi riba e tereno aki mas y cualkier desperdicio mester wordo deposita na e dump di Parkietenbos. Si esaki sigui sosode, e persona responsabel lo ricibi un multa mas halto di locual el a yega di haya caba. Departamentonan concerni a sinta hunto cu e persona cu ta encarga cu e tereno y a yega na un acuerdo pa pone mas tera, percura pa niun sushi wordo benta na e sitio aki mas.