Lo tin un reorganisacion total den Parke Arikok. Recientemente a wordo introduci un Raad van Toezicht, cu ta wordo presidi door di Sr. Fredis Refunjol. Sra. Helen van der Wal, Sr. Jossy Lacle, Sra. Daryahanani y Sr. Norman Kuiperi.
Entretanto a nombra Sra. Natasha da Silva como Conservation Manager y pone un anuncio den corant, pa un CEO, cual a trece basta atencion y awor ta den proceso di seleccion. Sr. Luifrido Croes ta encarga cu e parti di mantencion. E edificio y loke ta rond di dje a bay masha hopi atras. Dus e ta bezig ta trahando ariba e plannan, cu ta casi cla. E ta bay tin gastonan grandi cun’e, pa cual tin fondonan disponibel danki na DCNA.
Pa fin di 2019 y cuminsamento 2020, lo por tin un parke completamente renoba pa loke ta trata e edificionan. No mester lubida cu minister Oduber a duna autoridad pa por agrega 16 pida tereno cu lo bay forma parti di parke.
Tin bastante desaroyonan tumando luga den parke y tin hopi trabao cu mester wordo haci. Pero pa cada uno lo mester tin un plan di maneho, con ta reuni, kico ta haci cun’e, kico e metanan ta. En corto, tin hopi trabao pa wordo haci, segun Sr. Refunjol.
Tur loke ta cura, demarcacion, tur lo wordo coregi. Esaki lo bin den e rapport final pa asina trece dilanti cu Sr. Lufrido Croes lo presenta na directiva, di kico mester wordo atendi cun’e y con pa atend’e cun’e.
Relaciona cu cuanto hende por bay Conchi, tur esunnan cu ta bishit’e regularmente, por wak cu Conchi , como tal a bay masha hopi atras. Vegetacion, ta tira sushi eynan. Mester cuminsa na drecha e comportacion mas miho, y den e maneho nobo lo bay tin Rangernan cu lo tene control mas estricto pa loke ta Conchi (Natural Pool).