Manera conoci, Gobierno di Aruba lo implementa entrante 1 januari 2019 e prohibicion pa locual ta uzo productonan di plastic conoci como ‘single use plastics’ y oxybenzone. Awor e conteo oficial ta inicia pa locual ta e prohibicion di uzo di plastic (straw, cups, styrofoam) cu su fasenan pa implementa pa asina proteha nos medio ambiente y haci nos isla uno sostenibel.
Recientemente Minister di Desaroyo Teritorial, Infrastructura & Medio Ambiente Otmar Oduber a presenta un decreto nacional (Landsverordening) den cuadro cu prohibicion di uzo di plastic como tambe productonan di oxybenzone (sunblock). Aña 2019 ta conta manera un periodo di transicion. Durante e periodo aki lo tin campañanan di conscientisacion no solamente na localnan pero tambe pa nos turistanan. E meta ta pa cuminsa na conscientisa e consumidor y comerciantenan tocante e variedad di productonan alternativo y con nos por facilmente biba sin e uzo di plastic.
E siguiente fase lo ta e implementacion di sancion cual lo bay den efecto riba 1 di januari 2020, esaki pa duna tempo necesario pa e transicion bay adecuadamente. E prohibicion ta conta pa importacion, produccion y benta di productonan cu lo aparece riba e lista di prohibicion. E lista aki lo por wordo expandi den futuro cu mas productonan cu ta contene ingredientenan dañino na nos medio ambiente y naturalesa. Diferente partner den sector priva ya caba ta den proceso pa stop uzo di e productonan di plastic y otro a cuminsa planea algun luna pasa pa elimina e productonan prome cu e ley drenta na vigor. Gobierno lo sigui informa mientras e desaroyo ta cana su caminda pa percura cu tin bon ehecucion di e regulacionnan aki. E campaña ‘Choose 0 plastic’ lo ta e campaña cual ta cla pa ranca sali cu tur informacion necesario cu comunidad di Aruba lo tin mester pa keda al caso cu e desaroyonan aki.
