E beach policy introduci aña pasa, no a duna su resultado. Por bisa cu no tin casi ningun hende cu ta cumpliendo cu e reglanan nobo aki. E titular di Husticia, mr. Arthur Dowers a amplia mas ariba e tema aki.
Den siman cu a transcuri, e minister a reuni cu miembronan di ATA, ATIA y AHATA. Den e reunion aki el a wordo informa cu niun hende ta atene nan mes na e reglanan “nobo” di e beach policy. Pesey a keda dicidi durante e reunion di diahuebs cu su coleganan minister, cu lo cuminsa actua riba esun cu no ta cumpli.
Minister di Husticia a bisa cu dentro di dos siman, tur esunnan cu ta haci uzo di nos beachnan, lo haya un carta unda ta splica kico tur mester cumpli cun’e. Dus nan mester bay tene nan mes na e reglanan stipula y esun cu no kier haci esaki, nan lo mester bandona e beach tambe. Esun cu no kier cumpli, lo bay actua cu man duro contra nan.
E minister ta sali for di e punto di bista cu tur hende participando den e discusion ta haci esaki di bon boluntad. Tur hende kier pa e cos aki cana na un forma ordena y por duna un bon servicio ariba e beach, ya cu e beach ta keda un tereno publico di pais Aruba.
Aki dos siman e minister di Infrastructura, Turismo y Husticia lo bini hunto y lo evalua e pasonan cu a wordo tuma y cu ta cumpli of no ta cumpli. Despues di esaki lo bay over na tuma pasonan adicional, segun e titular di Husticia, mr. Arthur Dowers.