Minister di Turismo, sr. Dangui Oduber, ta comenta tocante e tema di siguridad pa nos bishitantenan na Aruba.
Minister Oduber ta lamenta e caso cu a sososde cerca di area hotelero durante fin di siman, cual a shock comunidad. E ta un preocupacion cu tin pa hopi tempo caba pa loke ta criminalidad cu a aumenta drasticamente. Nan ta haciendo nan maximo esfuerso pa ehecuta e vision y maneho cu nan tin. Awendia cu social media, informacionnan ta bay rond hopi lihe. Turistanan ta bin Aruba, pasobra Aruba ta keda un di e islanan mas sigur den Caribe. Pero lamentablemente sucedidonan asina sigur ta afecta nos siguridad. Nan tin un plan y nan ta uzando fondo di ATA por medio di Aruba Hotel Security Foundation pa pone prioridad no solamente den zonanan hotelero, sino tur zona cu turista bishita. No solamente esey, sino den comunidad tambe pa garantisa un ambiente sigur. Loke nan ta haciendo ta percura pa tin mas iluminacion den e area aki, percura pa tin mas camara di siguridad den e area aki, percura pa tin mas presencia policial durante tur ora di dia den e area aki.
Recientemente durante tratamento di Presupuesto di Tourism Product Enhancement Fund (TPEF) a presenta, miembronan di Parlamento a presenta un mocion. Den e caso aki, sr. Rocco Tjon cu lo ta un bon idea pa hook up e camaranan di siguridad cu hotelnan tin e momentonan aki riba e sistema di camara di siguridad di Cuerpo Policial. Gobierno ta apoya e iniciativa aki. Logicamente nan mester sinta na mesa cu AHATA pa wak si nan ta di acuerdo cu esaki. Minister Oduber ta enfatisa cu esaki ta un beneficio y un bienestar, pasobra e Central di Polis lo tin un overview di loke ta pasa na tur e hotelnan, sea ta dilanti hotel, paden di hotel, of banda di beach tambe. E ta confia cu AHATA ta dispuesto pa comparti esaki cu Cuerpo Policial p’asina nan por tin un sistema cu ta maneha tur e camaranan di siguridad rond di e isla. E intencion ta pa pone prioridad den siguridad di pueblo y turistanan, e Minister a conclui.