E situacion di nos comercio local ta hopi preocupante. Gobierno tambe ta haya informacion cu a pesar di ta wak cu tin movecion y tin plan, nan simplemente no por wanta mas pa keda habri. Prome Minister, Sra. mr. Evelyne Wever- Croes ta amplia mas ariba esaki.
AREA ta consisti di varios gruponan, tin un grupo cu nan ta yama stuurgroep y tin un grupo di trabao y e grupo di trabao di Playa ta diferente di loke esun di San Nicolas ta bezig cun’e. Cada un ta haciendo cosnan cu por wordo haci ariba termino cortico pa atrae hende. Pa San Nicolas ta pensando mas ariba movecion cultural, y ta pensando algo mas duradero y no algo di solamente un paar di weekend pa aña.
Pa Caya Betico Croes ta pensando con pa trece bida bek den dje. Ta pensando ariba e tema di parkeo, y a keda dicidi cu e parkeo mas cerca ta keda pa paga y esunnan mas leu lo keda gratis. A keda di papia tambe pa Caya Betico Croes keda habri pa trafico pasa. No kier habri’e completo ainda, pasobra cu tin cu mira ainda kico e ta efecto ariba e infrastructura, y si e ta daña loke tin. LO habri’e mainta y anochi pa un paar di ora. Despues lo tuma un decision.
Tambe a encarga Sra. Lyndsey Croes, conoci pa a organisa actividadnan den Caya Betico Croes, pa organisa actividadnan pa fin di aña. El a manda su calendar di actividad cu lo wordo trata den e Task Force.
Pa fin di luna lo tin un actividad organisa pa gobierno mes. Lo cende e lusnan di Pasco, e soundsystem lo cuminsa traha. Lo percura pa tin un dushi ambiente y asina gobierno ta cuminsa cu e temporada di fin di aña. Y mesco tambe ta wordo haci pa Centro di San Nicolas y tur esaki lo wordo anuncia dor di e respectivo organisacionnan. Y asina poco poco trece bida bek den e centro di ciudad.
Te asina leu, Sra. mr. Evelyn Wever- Croes, Prome Minister di Aruba.