Sr. Daniel Aguirre a splica cu e misa tin hopi necesidad pa ser drecha pa cual e meta di e actividad ta pa haya e fondo necesario.
E aña aki misa Birgen di Fatima lo ta cumpliendo 58 aña. Mantencion a bay hopi bon, pero e dak a yega momento cu mester wordo reemplasa. E dak a cuminsa laga bay, y mester wordo drecha pa siguridad di tur fiel parokiano y tambe bisiñanan.
E comision a dicidi cu lo no sigui haci restauracion chikito mas, pero lo haci un solo restauracion grandi. Nan lo cambia e dak completo, cambia loke mester wordo cambia. E cantidad di salpeter na Aruba ta actua definitivamente riba cualkier construccion y misa no ta niun excepcion. Tur locual ta pariba, ta haya e biento fuerte. Tambe e bentanal lo haya un facelift.
Tin algun detayenan pa drecha y algun kraak den e structura cu tambe lo wordo drecha. A bay haci full un estudio. No ta algo cu a bay poco poco, pero a haci full un estudio. Nan tin un compania cu ta haci full e diseño. Tambe e compania a yuda nan pa diseña loke nan kier den dje.
Ta mesun edificio lo keda, gewoon un facelift lo duna e misa, pero esaki ta trece gastonan cun’e. E total pa e prome fase aki ta papiando di 1 miyon 650 mil florin. Nan lo aprecia tur e donacionnan.
E comision tin tres aña recaudando fondo, y e comision ta asina contento cu nan ta cuminsa pa asina celebra e 100 aña di aparicion di Birgen di Fatima na grandi. E gasto mas grandi ta e dak, cual sigur ta un parti cu ta costa hopi placa, segun Sr. Aguirre.
E biaha aki nan ta bay full out y pa esey lo mester di e ayudo di e comunidad completo. E misa despues di e renovacion lo cambia poco, e dak y e ceiling paden. Nan a haci cierto reparacion casi 20 aña pasa. A bin hopi luz LED, y anochi lo kier baha e gasto di coriente. Nan kier improve e sonido, pero e cambio structural mas grandi ta bay ta e dak y esey ta hopi importante.