Recientemente miembronan di directiva di St. Fundacion Lotto Pa Deporte bow liderasgo di e Presidente Di-Stefano Wernet RA,director ing. Junior Tromp di St. Fundacion Facilidadnan Deportivo y Minister di Deporte, Dr. Alex Schwengle a haci un bishita di trabou na e Johan Cruyff Court na Jaburibari pa asina mira e diferente trabounan di renobacion cu lo tin plania pa e veld di futbol Johan Cruyff.
E Johan Cruyff Foundation lo tin un suma substancial pa e renovacion di e cancha di yerba artificial cu lo encera tambe e gastonan di transporte segun normanan/specificacion di dicho fundacion. Na banda cu e Johan Cruyff Foundation lo renoba e cancha di futbol, St. Fundacion Lotto pa Deporte lo pone un suma disponibel pa e renobacion y mantencion di e cura di hero y tegelnan. Tin tur indicacion cu lo por pone lus tambe na dicho compleho.
Durante añanan e Johan Cryuff Court na Jaburibari a bira masha popular. Tur atardi tin hopi mucha of grupo di hoben cu ta haci uso sanamente di e veld di futbol pa asina recrea nan mes den un forma positivo. E deporte di futbol ta e deporte mas praktica na Aruba y cancha di futbol Johan Cruyff sigur a contribui na e desaroyo positivo di tur cu a hasi uso di esaki. Manera e dicho mes ta bisa; “Esun cu tin e Hubentud, tin e futuro”! Pa nos Ministro di Deporte Dr. Alex Schwengle hubentud ta e fortalesa & pilar di un pais pa su desaroyo sano & economico. Ban sigi duna deporte & educacion na nos hubentud pa nan formacion como hende ejemplar den nos communidad.
Lotto, e Loteria National di Aruba ta sigui duna su aporte valioso na deporte na Aruba, pa cambia bida di cumpradonan, atletanan & compleho deportivonan den topsport & breedtesport.