Desde ayera caba ta na edificio di Colegio Frere Bonifacius, mirando cu tin un accion di limpiesa ta tumando luga. Tin adictonan ambulante ta drenta den e scol y a purba di cera e scol cierto partinan, pero ta mustra cu nan a drenta toch y a pone cu mester a drenta den accion cu autoridad y a pone ordo bek eynan.
Ayera algun adictonan a bay den tratamento y a splica e otronan cu si nan no bay boluntariamente bao di tratamento, y si nan no kier lo obliganan. En todo caso no por djis drenta ocupa luga di hende.
E luga ta full limpi. Awor aki lo bay pone extra control, patruya y siguridad te na e momento cu e situacion normalisa y despues di esey tin cu move pa otro sitio. Ta kitanan for di un luga y nan ta ocupa un otro edificio bashi.
Awor tin cu pasa na varios di e edificionan bashi cu si e ta di Gobierno of ta di comunidad. Por a mira cu esey tabata un exito. Si ta un luga priva ta pidi pa e doño pa e cera e luganan. Si ta di Gobierno esey lo bay wordo haci. Cada bes cu haci e teritorio mas chikito, tin di nan ta scoge pa bay tratamento.
Tin di nan ta pendiente pa bay Republica Dominicana. Tin algun di nan a pidi nan mes, despues cu a move un rato den caya, cu nan kier bay no centronan cu tin, pa asina prepara nan mes pa sea bay otro caminda of biba un tiki mas decente. Tin adictonan tambe cu edad ta subiendo y ta menos facil pa nan mantene nan mes riba caya.
Esey ta parti di e proceso di tratamento y di guia na e adictonan.
E minister e agrega cu tempo e tabata minister di Enseñansa, tabata tin palabracion cu e parti di edificio aki lo a wordo basha abao, como cu e tabata hopi daña. Tin parti cu ta monumental y tin parti cu por mantene. Di e tempo ey a bisa cu lo kier haya esaki y duna na Universidad, pasobra nan por haci bon uzo di dje. Si mira e waya di universidad ta net pega cu e scol aki, e lo ta un bunita caminda pa e universidad por amplia.
Pero e minister no ta bay pa esaki mas, ta su colega minister di enseñansa y SKOA lo mester dicidi.
Pa uze como un scol e no ta adecuado mas. Mester tuma un decision si riba dje pasobra no tin sentido cu e luga por para y e bay atras.
Loke cu ta bay percura p’e y hunto cu minister di infrastructura, ta laga e caminda cu por cera, mirando cu e no tin e facilidad ey y lo pone pa wanta mas siguridad den tempo cu ta bin nos dilanti te na momento cu bin nan un decision of un solucion permanente.
A prepara tur institutonan, a wordo remodela, pone material, tur cos ta optimal awor aki pa loke ta trata brindamento di servicio pa loke ta trata material. Sinembargo e parti di personal ta un reto grandi.
Ta sacando propaganda pa wak si por tuma personal nobo, specialmente enfermeronan, ta haci hopi falta pasobra hopi di e personanan cu ta atende cun’e, banda di tin e malesa di adiccion, tin bes tin otro malesanan cu mester di tratamento medico tambe y esey ta importante pa tin e personal medico.
Hopi esfuerso ta wordo haci aki. Ta spera cu e propaganda sali pa otro siman y hende solicita, pasobra e trabao aki ta uno, aunke e ta dificil, of frustrante pasobra ta mira hopi hende ta rehabilita despues bolbe cay, toch e ta un trabao noble y pesey ta haci un apelacion tambe na esnan cu ta trahando of porta a caba di studia, pa solicita pa un funcion den un di e centronan di adicion y cuido mental. Un cos hopi importante tambe ta cu e hendenan cu ta trahando awor aki, tin cierto caminda, ta mira bon resultado, cerca hobennan tambe. Tin varios hoben nobo ta drenta trayectoria, lamentablemente, pero esey ta cos cu tur caminda di mundo ta mir’e. Esey no ta nifica cu ta sinta keto y ta sinta pusha y caminda cu tin mester, obliga nan tambe pa tuma tratamento.
E minister a haci uzo pa haci un apelacion na comunidad, pa ta conciente di e riesgo di droga. Hopi biaha ta wak cu droga ta wordo promovi y no mester bruha asunto di uzo medicinal y uzo recreacional di droga, pasobra cu e ta un cos completamente diferente. Muchanan di 11, 12, 13 of 14 aña cu ta mete cu droga, ta haya daño. Hobennan cu mete cu droga prome cu su celebro wordo desaroya, e tin efecto negativo riba bo y mester keda haci esey conoci na comunidad. Keda haci apelacion na mayornan, na bisiñanan, educadornan, yuda e muchanan keda for di droga. E no ta bon pabo, ora bo ta un mucha jong. Keda for di dje, pasobra un mucha ora cu e nace, tur hende ta contento cun’e, pa despues e desaroya na un hende cu ta riba caya cual ningun di nos ta desea pa nos yiu of prohimonan. Ban cera cabes pa hiba e lucha cu no solamente nos tin cu hiba. Hopi caminda di mundo e ta wordo hiba. For di e parti hudicial tin un lucha tenas contra e negoshi di droga y labamento di placa rond di droga, pero e parti di prevencion pa hende yega na e droga, tin cu wordo haci pa henter e comunidad, departamentonan, media, scol, famia, iglesia, nos tur tin cu duna un man sino nos no ta gana e bataya contra e maldito droga.