Minister di Enseñansa, Sr. dr. Rudy Lampe, den caso aki ya no por warda pa mas pasa, sino mester tuma accion lo mas pronto posibel. P’esey ya a cuminsa traha cu diferente departamentonan pa e ley obligacion di enseñansa.
E problematica aki di abuso di mucha, den nos comunidad door di e sacrificio, e dolor, e sufrimento, e tragedia humano, tur aworaki ta wordo obliga pa pensa den e mesun direccion, un tema cu a keda pendiente y aworaki tin cu actua ariba esey.
Nos sociedad, nos comunidad no por tolera mas abuso di mucha. Y minister di enseñansa cu e colaboracion cu e demas ministernan, hunto cu Prome Minister, a dicidi di bin cu un accion. E prome accion lo ta pa reuni cu Bureau Leerplicht pa bay wak unda tin obstaculonan burocratico, y tambe pa implementacion di e ley di leerplicht pa evita cu den futuro bo ta haya un situacion manera e caso aki, cu ya pa fin di Augustus, cuminsamento di September nan no a presenta na scol, toch no tabata tin e follow up necesario. Esey ta bay ta e prome accion.
E di dos accion ta pa reuni e siman aki ainda, cu esunnan cu organisatoriamente ta encarga cu e schoolhoofdenoverleg, pa asina aki, planea un encuentro cu e cabesantenan di scol, pa trainnan pa loke ta e conocemento di e ley di leerplicht. Esey tambe ta falta cu como cabesante bo ta mara na ley, despues di dies dia di ausencia di un mucha na scol, bo mester meld esaki. E falta di conocemento di ley aki ta general bou di nos ciudadanonan, pero lo kier remedia esaki cu un sesion special cu nos cabesantenan di scol.
E di tres accion cu gobierno lo implementa, ta cuminsa cu train tambe e docentenan pa nan por detecta señalnan, pasobra nan tin e contacto diario cu e muchanan, cu ta trata di posibel caso di abuso cu e muchanan aki posiblemente ta victima di algun tipo di abuso. E abuso fisico, e abuso sexual y lo kier train e docentenan pa nan por detecta y por deduci cu e conducta di e mucha por duna indicacion cu nan por ta victima y despues manera Prome Minister a bisa, unabes cu nan a observa esaki pa nan por meld na e meldpunt, e posibel casonan aki di abuso di mucha.
Ya caba e minister di Enseñansa tabata tin un contacto cu un fundacion, cu rond di 10 di December cu ta Dia Internacional di Derecho Humano, pa cuminsa cu e prome conferencia relaciona pa train nos maestronan.
Diaranson, dr. Rudy Lampe, minister di Enseñansa, a reuni cu Direktie Onderwijs, cual ta e di cuater punto di accion, unda cu tin un plan pa bin cu un Plan Integral di Maneho pa Hubentud, y cu aworaki mester wordo acelera. Cu e mensahe ta cu hopi di e departamentonan ta traha manera un isla ariba nan mes y aworaki mester bin un cooperacion integral entre e diferente departamentonan pa loke ta e maneho pa e muchanan y nos hobennan, basa ariba un vision educativo, kico kiermen educa muchanan. Ta algo cu ta responsabilidad di henter comunidad, pero mester bay traha mas na un forma integral. Y e Plan di Maneho Integral pa Hobennan na nivel educativo lo wordo desaroya den colaboracion estrecho cu Departamentonan Social cu ta cay bou di Minister Glenbert Croes.
E plan integral aki, ta bay ta door di e sucedido aki e ta bay den un proceso acelera pa asina por atende loke ta conoci cu mester tin un cooperacion entre scolnan, maestronan, alumnonan y mayornan.
Enseñansa no ta solamente di e maestro, pero e ta cuminsa na cas. Kiermen mester bin cu e plan integral al respecto. Esaki ta e accionnan di inmediato di parti di Ministerio di Enseñansa, den cooperacion cu diferente ministerionan.
Despues di e dia nacional di luto, kico boso como gobierno ta bay haci? A yega e mometno pa drenta den accion y cu esaki ta keda demostra cu e gobierno ta tuma na serio e grito aki, di parti di comunidad pa cuminsa actua pa asina aki, yega na un Aruba sin abuso di mucha. Asina minister di Enseñansa, dr. Rudy Lampe, a declara.