Diaranson atardi un situacion sumamente lamentabel a wordo constata na saliña cu un tereno den Wetland. Locual cu a constata ta cu trabounan di construccion a cuminsa tuma luga riba un tereno cu segun nos ROP mester wordo destina como areanan pa conserva. E area en cuestion ta importante pa nos medio ambiente y entre otro ta yuda pa colecta awa ora di yobida.
Sr. Ghisberto Boekhoudt consehero di Ministerio di Infrastructura y Medio Ambiente ta splica cu e situacion aki ta inaceptabel. E tereno ta den Wetland y pues ta un tereno cu no por wordo duna. Sinembargo ta constata cu a pesar di esaki toch e tereno aki a wordo otorga den periodo di gobernacion di Gobierno anterior. E tipo di situacionnan aki lo no bay wordo tolera y un reunion cu caracter di urgencia lo wordo yama pa cuminsa cu investigacion riba e caso aki y varios otro situacionnan di opcionnan di tereno cu a wordo duna riba tereno den Wetland.
E gobierno anterior no tabata respeta naturalesa y e derecho di existencia di naturalesa. Locual ta sumamente lamentabel tambe ta cu e consecuencia di e decisionnan aki lo no wordo mira aworaki di biaha, sino mas na cabamento di aña, october bay dilanti ora cu awa cuminsa yobe fuerte.
E Maneho di e Gobierno actual di Gabinete Wever – Croes lo bay fomenta mas den direccion di proteccion di e areanan aki. Si e areanan aki cuminsa wordo otorga, lo no tin mucho espacio pa naturalesa mas, cu tur e consecuencianan negativo cu esaki lo tin pa nos medio ambiente. Maneho di Minister di Infrastructura y Medio Ambiente Otmar Oduber ta dirigi riba proteccion di e areanan aki cu ta destina pa naturalesa y lo bay actua pisa riba e tipo di accionnan aki y lo tin sancionnan cu lo bay bin tambe, Sr. Ghisberto Boekhoudt consehero di Ministerio encarga cu Infrastructura y Medio Ambiente a enfatisa.