Diadomingo ultimo a saca e ganadornan di e rifa di Lions, aki a saca 5 ganador kendenan a gana un bicicleta electrico, un toycar electrico, un step electrico , un scooter electrico y un auto electrico.
Ariba diabierna 11 di november a tuma lugar e entrega di e premionan aki caminda cu e felis ganadornan a bay ricibi nan premio.
¨Aruba Lions Club ta masha contento y satisfecho cu e resultado di e rifa. Aruba a colabora masalmente y nos ta agaradeci cu esaki y sigur tambe na AlltoCar y prensa cu a colabora tremendamente cu nos¨ Rubin Ponson, presidente di Lions Club ta expresa.
Rubin ta sigui conta cu ora nan a saca e premio mas grandi nan a yama e ganador pa bise di su premio, cual e persona cu a gana esaki a bira masha felis paso e tabata buscando un auto economico segunda mano. E suerte tabata cu e señora cu awor ya no mester cumpra auto.
Allto Car a expresa cu nan ta sinti masha honra di por a forma parti di Lions su campaña y cu awe 5 di nan productonan electrico por tin un doño.
E nombernan ganador a resulta cu e auto electrico pa mucha premio nr 5, a bai pa Carla Martinus.
E “step” electrico, premio nr 4 a bay pa Dylan y Dyeon Arends.
Premio nr 3 cu ta un bicicleta electrico a bai pa un compania di installacion di coriente, despues a sigui pa e premio nr 2 cu ta un “scooter electrico” cu a bai pa Gilbert Dirksz.
Na momento cu a saca e promer premio unda cu e ticket a keda conoci, e la wordo yama dilanti henter e publico cu por a scucha e palabranan jena cu emocion ora cu a informa sra Girigoria Croes di Kas Ariba cu e la gana e auto electrico di Aruba Lions Club.
Asina e 5 ganadornan a keda conoci y mester bisa cu diabierna ultimo e premionan a wordo entrega na e ganadornan den e showroom di All to Car.
Pueblo di Aruba cu a contribui cu Lions Club por ta sigur cu e siguiente plan ta pa pone e fondonan aki disponible pa sirbi esnan den necesidad.
Pabien na e felis ganadornan.