Randolf Vrolijk kende ta presidente di Aruba Lion’s Club, a presenta e rifa di cas pa 2017 pa cual e meta ta cuminsa bende tempran pa por logra di meta di haya fondo pa asina sigui yuda nos comunidad pa cual nan ta bin ta haci pa hopi aña aki. Esaki ta di 59 rifa di cas di Aruba Lions Club. Aruba Lions Club ta conoci pa tur aña tin su rifa di cas y e aña aki atrobe a dicidi cu lo rifa un cas. Ta hopi special pa e club, pasobra ta prome biaha cu Aruba Lions ta bay rifa un cas cu a yega na mita di Aruba. Den e caso aki ta na Jan Flemming na Santa Cruz. Un cas modelo blenchi. Despues di hopi deliberacion, a bisa cu ta bay cambia e aña aki pa un otro bario. Intencion ta pa e añanan siguiente bay den otro barionan tambe. Otro districtonan. A pensa riba Pos Chikito, Savaneta, San Nicolas. Pero esey ta den e añanan venidero.
Esaki ta un cas na balor di 220 mil florin, situa na Jan Flemming riba un tereno erfpacht, 2 camber y dos baño. Desde aña 1992 Aruba Lions Club su ticket ta solamente 25 florin pa ticket. E ta un prijs rasonabel. A tene hopi cuenta cu diferente aspecto y a delibera. A bisa cu lo mantene e prijs aki. Mas bien cu ta bay pa kier pa un ciudadano di e pais aki bira doño di su cas y lo hunga dia 9 di Juni otro aña. Cu cada compra di un rifa cu ta den wega di Aruba Lions, no solamente di esey, ta considere como un donacion di Aruba Lions. Cu e donacion aki ta sigui brinda no solamente e cantidad di servicio, pero e calidad di servicio cu Aruba Lions a bin ta conoce pa e ultimo 69 aña. Otro aña, hunto cu e cas, lo celebra 70 aña di existencia cu a bin ta yuda comunidad. E 25 florin ta un donacion pa por sigui yuda. Tur esnan cu mester un rolstoel, un cama di hospital, organisacionnan cu mester di ayuda di Lions y sin ayudo di comunidad, e ta bira hopi dificil pa Aruba Lions por sigui brinda e calidad di servicio cu semper a brinda. Comunidad semper a respalda nan y e aña aki atrobe ta conta cu e respaldo aki, mirando cu ta bay un otro districto. Un oportunidad tremendo pa bo gana bo cas y cu 25 florin bo por bira doño di bo cas. Na mes momento ta yuda otronan cu mester di ayudo.
Ta na caminda pa 70 aniversario. Fuera e rifa di cas, lo bay tin hopi mas otro actividad cu lo ta na caminda. Pero ta pidi comunidad pa yuda. Awe tabata prome dia cu a lansa oficialmente e rifa. Desde mañan caba e ta disponibel cerca e miembronan di Lions na diferente luga rond Aruba cual lo wordo anuncia den prensa. Tur por haya e ticket pa asina ta den wega pa ta un feliz ganado di e cas di Aruba Lions.