Dia 10 di Juni for di 11:00 am -1:00 pm De Wit & Van Dorp situa na Dakota ta conta cu presencia di Lily Clarisa kende ta presenta y firma su buki ‘Lost Love Poems’ na tur su publico.
‘Lost Love Poems’ ta un coleccion di 49 poesia cu ta hibabo riba un biahe emocional for di etapa di amor te cu periodo di desamor.
‘Lost Love Poems’ ta hibabo door di e aventura cu yama amor; e parti bon, e malo, e deseo, e desesperacion te na olvido y desamor. Na final, ora bo pensa cu amor ta caba na nada, e chispa ta sende bek y e ta cuminsa full di nobo.
E storia di Lily Clarisa:
Ya for di chikito caba Lily Clarisa a cuminsa skirbi poesia, novela pa hoben adulto y tambe storia pa mucha (pendiente publicacion). Na 2015 y na edad di binti tres aña, el a publica su prome buki di poesia titula ‘Lost Love Poems’. E prome volumen di e buki ‘Lost Love Poems’ ta concentra riba e inocencia, puresa, anhelo y e efecto casi obsesivo. E segundo volumen ta cubri efecto devastador cu amor por tin y cu ta laga bo sinti perdi. E mensahe cardinal cu ‘Lost Love Poems’ ta trece dilanti ta pa nunca stop di kere den bo mes, ni den otro. Amor por kibra, kima y caba, pero bida ta sigui; acepta e dolor, pasa door di e proceso pero sigui pa dilanti, stima otro y stima bo mes, prome cu tur cos.
Lily Clarisa tambe ta un artista-interprete di arte y ta recita su poesia durante evento ‘Poetry Nights on Aruba’. E ta docente di Ingles y escritora. Lily actualmente ta studiando pa obtene su BA in Teaching English as a Foreign Language for di Windesheim college situa na Zwolle, Hulanda. Actualmente, Lily ta duna les di Ingles na studiantenan di EPB HATO na Oranjestad, Aruba.
Lost Love Poems ta obtenibel na Dewit Vandorp na Dakota y na Aruba Post situa na San Nicolas.
Pues bo ta bonbini na De Wit & Van Dorp Dakota Diasabra awor pa topa cu Lily z y lag’e firma su buki pa bo. De Wit & Van Dorp Stores ta un compania local cu ya ta forma parti di comunidad di Aruba pa mas di 65 aña. Bishita nos pagina di Facebook: Dewit Vandorp.