“El a bay hopi bon”, esaki tabata e prome palabranan di Liliana Rasmijn, di e departamento di Comunicacion, Informacion y Prevencion di Cuerpo Policial Aruba, net despues di final di e parada di flambeu cu a cuminsa exactamente 8:15pm diasabra anochi y a bin termina diadomingo pa 1:30am. Polis ta sinti toch cu el a caba na un ora aceptabel, specialmente teniendo na cuenta e retonan cu tabatin durante e parada.
E vocero suplente di Cuerpo Policial a splica cu un truck di Empire Carnival Group a confronta su mes cu retonan di flat tire durante e parada, cu tabata menasa cu tardansa. Mester menciona cu e grupo mes a busca solucion, pa yena e tairanan, pa e parada por a sigui toch.
“Berdad nos a duna un break di 15 minuut, pero esey no tin nada di haber cu truck daña, sino ta pa e brassband por descansa un rato”, asina Liliana Rasmijn a aclaria.
Di otro banda, Polis a detene solamente 8 sospechoso, compara cu 15 di aña pasa, pues ta nota un reduccion substancial. Asina mes Polis a topa cu un persona cu cuchiu, otro burachi, bringamento, maltrato y na final a haya un conoci di Polis di fam K, cu durante control y listramento a hay’e cu un arma di airsoft modifica, cu tabata parce un UZI. A detene di biaha y a hib’e Warda di Polis.
Na tur Polis a otorga Afl. 1675,= na multa, relaciona cu e maneho di “Faya bo Haya”. E suma aki ta mas abou compara cu aña pasa, aunke cu e multanan e aña aki a varia entre Afl. 250 te na Afl. 650 cu tabata esun di mas halto.
Cuerpo Policial a percura pa 65 Polis uniforma den parada, pero acerca tabatin varios otro ekipo cu na tur ta surpasa 120 Polis trahando prome, durante y despues di e parada, tanto paden como den banda tambe.
E organisacion policial ta contento di un banda cu e esfuersonan di prevencion ta dunando resultado. Di otro banda ta corda tur hende cu Polis lo sigui cu e maneho di “Faya bo Haya” of tambe “Lik op Stuk” pa cual ta otorga multa mesora ora di un delito. E maneho aki lo sigui te na final di carnaval, pa cual publico mester ta bon consciente di e consecuencianan.
Na final, Liliana Rasmijn a haci un apelacion na automobilistanan specialmente pa percura pa un hende den e grupo no ta bebe pa e por stuur. Te ainda ta topa cu mucho caso di chauffeurnan burachi despues di eventonan carnavalesco. Corda cu Polis ta controla tur caminda y e consecuencia ta detencion, multa, kita auto y kisas hasta un cuarto gratis na warda di polis.
Ta desea henter comunidad un dushi temporada di carnaval, gosa den forma sano y celebra e bunitesa, e ambiente y e creatividad di nos carnavalistanan y nos carnaval en general.