Ta spera cu 2024 lo ta hopi mas miho cu 2023 na momento di bay recauda fondo den comunidad di Aruba. Ta loke cu Lilly Prince, presidente di Koningin Wilhelminafonds a indica.
E gastonan a subi sumamente halto, pero esey no ta haci cu ta perde e confiansa den e comunidad aki cu por logra haya e cen cu tin mester pa sigui run Wihleminafonds.
Wilhelminafonds su hendenan cu ta traha eynan, tur ta traha boluntario. Nan no ta ricibi ningun sorto di pago, ni pa telefon, ni pa gasolin. Nan ta traha boluntario pa comunidad di Aruba y muy en particular, p’e pashentnan y e famianan cu tin di haber cu e malesa cancer, segun Prince.
Yudansa ta sali gratuito pa tur persona cu ta inscribi na KWF cu tin cu haya sea pa haya tratamento na oncologia of na ImSan pa radiotherapie, pa bay cerca nan specialista ora nan tin cu haya nan chekeo cu mester prome cu nan haya tratamento. Tur e gastonan aki KWF ta cubri y p’e pashent e ta gratis.
ANIVERSARIO
Dia 4 di februari ta net 63 aña pasa cu KWF a wordo funda oficialmente aki na Aruba. Ya nan tabatin algun aña prome, pero e añanan ey tabata manera un startup, pero dia 4 di februari, 1961, KWF a wordo funda. Awe nos ta recorda esey y ta gradici nos bon Dios cu te awe e fundacion aki ta lora y no ta keda sin bisa cu un palabra grandi di gradicimento ta bay pa e comunidad Arubano cu semper a sa di apoya Koningin Wilhelminafonds den su trabaonan cu anualmente ora cu sali riba caya nan ta haci nan donacion.
SITUACION DIFICIL
Aña pasa tabata un di e añanan cu tabata un tiki mas dificil pa KWF. A pesar cu a sali varios biaha riba caya, riba diasabra, pero aña pasa a yega net 35 mil florin. Cu 35 mil florin ta net dos luna cu por paga cierto gastonan. Muy en particular gastonan ora cu tin e verpleegsternan cu ta atende cu e pashentnan na cas, e atencion aki ta gratuito na pashent. Famia no tin nada di paga.
Pero KWF si mester percura pa e tin pa e cubri e gasto sikiera di gasolin di e verpleegsternan cu ta bay y duna e atencion aki n’e pashentnan. P’esey e aña aki un biaha mas ta cuminsa for di awo, ta avisa comunidad di Aruba cu den luna di april, lo bay cuminsa cu nan campaña di colecta. Naturalmente tin di adapta n’e situacion mundial cu tin y e situacion aki na Aruba tambe.
