PARIS, Francia- Lidernan di mundo henter diadomingo a conmemora na Paris e centenario di e fin di Prome Guera Mundial, den un acto solemne unda cu Presidente Emmanuel Macron a adverti di e riesgonan di nacionalismo. Esaki ta ora cu e diferencianan entre Europa y presidente Mericano, Donald Trump.
Trump, e mandatario Ruso Vladimir Putin, e Turco Recep Tayyip Erdogan y e canciyer Aleman Angela Merkel a participa, entre cerca di 70 hefe di estado y di gobierno, den e conmemoracionnan., cu a alcansa su punto mas halto na e Arc du Triumph y lo conclui cu’n Foro di Paz.
Belnan di misa a zona den Francia henter pa 11 or di mainta, e mesun hora cu shen aña pasa e trompetnan a zona anunciando un stop di tiramento den e camponan di bataya.
E ceremonia a wordo celebra na e graf di e soldat desconoci bou di Arc du Triumph, cu ta representa 10 miyon combatiente cu e muri durante e Prome Guera Mundial (1914-1918). Ademas, entre 5 y 10 miyon civil a perde nan bida den e conflicto.
E mandatarionan, entre cual tabata tin Rey Felipe VI, y presidente di gobierno Spaño, PEdro Sanchez, e Prome Minister Canades, Justin Trudeau y e Prome Minister Israeli, Benjamin Netanyahu, a yega Camp Elissee den bus y a recore e ultimo meter na pia den un corteho presidi pa Macron y Merkel.
Trump y Putin a yega apart, e prome a bordo di su limousine blinda preto, conoci como ‘The Beast’.
Mas di 10 mil polis y guardianan a wordo desplega pa garantisa e siguridad di e mandatarionan y nan delegacion, den un capital bou di menasa permanente di atentado di 2015.
Esaki no a stroba tres activista di Femen pa bula over di e barera di siguridad na Campo Elisee y yega cerca di e convoy di Trump. E muhenan a wordo deteni, nan tabata cu pecho sunu y tabata tin como mensahe “Fake Peace Maker” of “Hypocrisy” scirbi ariba nan curpa.
Presidente Frances a enfatisa “Laga nos no lubida”, prome cu el a aviva e “candela eterno” instala ariba e graf.
Despues di e cu e trompetnan a zona, recordando cu 100 aña pasa a anuncia e stop di tiramento, e mandatarionan a regresa e Palacio di Eliseo, sede di e presidencia Frances pa un lunch oficial.
E centenario di tregua a wordo conmemora tambe na otro paisnan rond mundo.
Australia, New Zealnad y India a recorda den actonan emotivo na e mas di 150 mil militarnan di e paisnan aki cu a perde nan vida den e conflicto.
Prome Minister Britanico Theresa May y Prins Charles, den representacion di Reina Isabel II, a asisti cu e presidente Aleman Frank -Walter Steinmeier den un acto unda cu miles di simpatisante tambe a rindi homenahe na militarnan cu a perde na vida.
Polonia di su banda a celebra su independencia, recupera despues di e guera na 1918, despues di cu su teritorio tabata reparti durante 123 aña entre Rusia, Prusia y e Imperio Austrohungaro.