Den Haag, HULANDA- E informado Edith Schippers dialuna lo combersa cu tur e diestres lidernan di fraccion riba un posibel coalicion di gobierno. Mark Rutte (VVD) ta programa pa 8.30 di mainta y e ta e prome na turno, sigui pa Jesse Klaver (Groen Links), Alexander Pechthold (D66) y Sybrand van Haersma Buma (CDA).
E combersacionnan lo tuma luga henter dia. Thierry Baudet di e Forum voor Democratie (FvD) lo ta na beurt pa 7.15 di anochi y tambe e lo ta e ultimo. E combersacionnan lo tuma luga den e edificio di Tweede Kamer.
Tweede Kamer lo debati diahuebs riba e resultado di eleccion y lo pasa e informacion over pa e Informado. Despues Kamer lo apunta un of mas informado.
Ya caba 99 % di e votonan ta conta. E asistencia a yega na 80.8%. Esaki por deduci di e cifranan di e Verkiezingsdienst. Tres gemeente falta ainda pa conta e votonan.
Di e casi 13 miyon persona cu derecho di voto, sigur 10.4 miyon a deposita un voto valido. Tin un cantidad minimo di 29 mil di e 13 miyonnan cu a vota invalido y casi 15 mil voto blanco. E ultimo eleccion a conta cu un asistencia di casi 74.6%.