Den rueda di prensa Andin Bikker lider di Partido Democracia Real a referi na e disputa riba loke Valero tin cu paga na belasting, podise e ta sigui cana, pero importante ta cu nan a separa e aspecto aki for di e totalidad.
Cuanto mester paga na belasting no mester stop henter e totalidad di si ta bay haci reapertura of no, y vooral awor cu a base di e amienda di aña 2010 por apela te na Corte Supremo.
Andin Bikker a splica cu hopi hende no ta realisa kico e logro grandi aki ta nifica. El a bisa cu e tempo ey e doño di e refineria no tabata tin mas caminda pa cana, pasobra no tabata tin mas manera di apela cu via Raad van Beroep. “Anto e tempo ey nan a bay den cuestion di arbitrahe fiscal te na Hulanda y esaki a wordo hiba te ora nan a yega na un acuerdo na 2010 cu Valero, pero aworaki cualkier compania estableci na Aruba, tin e derecho di apela te na Corte Supremo sin mester haci gasto pa bay den arbitrahe, pasobra no tabata tin ningun instituto pa haci apelacion mas leu cu Raad van Beroep” Andin Bikker a relata.
E parlamentario a splica cu riba e discusion di cuanto mester paga riba caso di belasting, e ta contento en todo caso di constata, aunke e no tin informacion concreto pero por deduci, cu nan a separa e discusion di cuanto mester paga pa loke ta trata belasting for di e otro temanan cu mester por sigui cana pa promove e reapertura di e refineria.