Diamars mainta a tuma luga e ceremonia pa apertura di Aña Parlamentario nobo 2021-2022 camidna manera ta tradicional, Gobernado a hiba su discurso, cual manera ta conoci ta un mensahe prepara pa gobierno pa e ocasion aki.
Un mensahe cu lider di fraccion di AVP den Parlamento, Mike Eman, a considera un mensahe di gobierno cu ta hopi distancia for di e realidad penoso cu pueblo di Aruba ta bibando aden pa algun tempo caba.
“Si mira cu Gobernado a haci un presentacion di parti di gobierno cu a dura casi mey ora y e palabra pobreza no a cay ni un solo bes, un situacion cu nos a encontra den casnan rond Aruba, den barionan.
Casnan cu mi persona a bishita caminda tin hendenan sin trabou, desempleado, necesidadnan grandi den nos comunidad, caminda mas di 30% di esunnan cu a wordo intrevista dor di Banco Central, a bisa cu pa pone man riba mes den nan cas, nan mester di asistencia di Cruz Cora entre otro.
Mas di 50% di esunnan cu a wordo entrevista, a bisa cu nan tin un inkietud grandi pa cu nan entrada pa e lunanan dilanti, pues un inkietud pa e situacion real social economico di nos pais cu ta wordo totalmente ignora dor di gobierno.”
Pues un inkietud hopi hopi grandi den nos comunidad, pobresa y inkietud pa cu democracia, inkietud pa cu institutonan y nunca antes nos a conoce un periodo caminda cu tanto duda tin si e institucionan di mas importante di nos pais, ta wordo influencia politicamente.
Un situacion cu ta mustra cu e dolornan di mas grandi den e pais aki, cu nos a mira den miles di cas rond Aruba cu nos a bishita, hendenan cu ta cuminsa bandona e pais, gobierno no tin ningun atencion pa e situacionnan sumamente delicado aki,” lider di fraccion di AVP, Mike Eman a declara.