SARMADA, Siria – Den un atake realisa cu un drone Mericano a fayece un alto dirigente di Al Qaeda na Siria cu tabata opera antes na Afganistan, Pentagono a anuncia diamars.
E atake, lansa dia 18 di November cerca di Sarmada, noordoost di Siria, tabata tin como blanco Abu Afghan al-Masri, e secretario di prensa di Pentagono, Peter Cook, a bisa.
“Al-Masri, Egipcio, originalmente a integra den Al Qaeda na Afganistan y mas despues a pasa e organisacion pa Siria,” Cook a bisa, subrayando cu Masrti tin conexion cu gruponan “terorista” cu ta opera den zuidwest di Asia.
Pentagono no a brinda informacionnan suplementario riba e Yihadista, limitando na afirma cu tabata trata di un persona “cu un papel di lider” den Al-Qaeda.
“El a yuda organisa e actividadnan di Al-Qaeda” y tabata ‘bao di nos radar ya pa un tempo,” Cook a agrega.
Un coalicion lidera pa Merca, ta combati e grupo Estado Islamico na Siria, pero tambe a golpia lidernan di otro grupo, manera Frente Al Nusra, cu a cambia di nomber pa Fatah al-Sham.
Na October, Pentagono a bisa cu un atake aereo di Merca cerca di Idlib a ataca un lider di Al Nusra, Ahmed Salama Mabrouk, un Egipcio tambe conoci pa su nomber di guera di Abu Faraj.
Fuente: NTN24