Playoff HEINEKEN fast pitch di Aruba Softball Bond a yega su final diabierna ultimo riba veld di Kudawecha momento cu Piratas Bronx Birds a titula campeon derotando Celebreties 14-10 pa asina “sweep” e serie di best out of 5. Aruba Softball Bond mesora a bay over na entrega tanto premionan cu e ekiponan campeon y sub campeon merecidamente mester ricibi pero tambe a entrega premionan individual na esnan cu a destaca durante henter e temporada. Madrina di aña di ASB Sra. Kelly a haci entrega di e premionan. E premio di Champion Batter a bay pa Leyvis Gonzalez di e ekipo Piratas batiando 26-13 bon pa un averahe di 500. Champion pitcher a resulta Guillermo Montiel di Piratas cu 4 victoria y 0 derota durante campeonato regular pero alabes Guillermo Montiel a bay cu e premio di MVP cual premio ta wordo saca for di e serie final unda Guillermo a sa di gana 2 di e 3 partidonan di final incluyendo e ultimo wega cargando su ekipo durante e proceso esaki. Champion Homerun y pues e Homerun King a bay pa Jason Albus di Celebrities cu 2 cuadrangular pafo di parke. Pabien na e ekipo Campeon di A-Klas Piratas kende den 2017 lo melita den AA. Pabien na Celebrities cu nan titulo di Sub Campeon. Pabien na tur e atletanan cu a destaca individual. ASB ta felicita tambe e cuerpo di umpires y scorers y tur cu a duna di nan banda pa haci e campeonato aki uno exitoso. Riba e potretnan por aprecia momento cu a haci entrega di premionan individual.