Ley nobo di LTU ta trece hopi cambionan na DIMAS

0

Sra. Kathy Paskel, director di DIMAS, ta splica tocante e ley nobo di LTU cu a cuminsa dia 1 di december 2018. E ley aki ta uno cu ta trece hopi cambionan cun’e, riba e parti di ken ta considera cu e LTU no ta aplicabel pe. Esaki a wordo extendi.
Aworaki un Hulandes (Europeo) cu tin 10 aña legal na Aruba, ta cay bou di e definicion aki y por haya un declaracion cu el a bira un persona cu ta cay bou di e categoria ey. Tambe e categoria di esunnan cu ta haya un titulo cu nan ta van rechtswege na Aruba, tambe a conoce cierto cambionan, esey ta articulo 3. Y eynan, por a wak pa e Hulandes tin algun cambio, unda antes tabata 5 aña sin interupcion na Aruba, aworaki e pida ‘sin interupcion’ ta cay afo.
Un otro cambio cu a surgi cu e ley aki, ta e persona casa cu Arubiano ta desea di keda na Aruba, si e ta desea di keda Aruba, e lo mester pidi un permiso pa e prome 5 añanan. Esaki ta un punto cu lo mester bay splica na e comunidad di kico esaki ta.
Tambe tin cierto cambionan, manera anticipa pa añanan largo, unda cu e permiso pa estadia temporal pa un hende cu por traha, den ley e tabata mara na un maximo di 3 aña. Cu e cambio di ley aki, e modelo Suiso ta cay afo, y no ta existi mas. Un hende cu tin permiso di trabao, contal cu e cumpli cu e reglanan, por sigui aplica despues di 3 permiso. Pero esey ‘beleidsmatig’ no tabata wordo aplica mas desde 2010. Aworaki el a haya su base den e ley.
Tambe por wak cambionan riba ken y na ki manera bo ta perde un titulo di estadia, tanto pa permiso temporario, como ‘van rechtswege’ y pa tempo indefini, tin cambionan. Y a tene cuenta cu diferente aspectonan. Si antes, un hende cu tin un titulo di estadia pa un tempo indefini (firma liber), si e la keda mas cu’n aña den exterior, esaki por tabata motibo pa pensa cu e persona aki a perde e titulo cu el a perde durante 10 aña, al menos cu e por mustra cu e ta pa motibo di salud y/of estudio, esaki a cambia pa si e persona keda mas di 10 aña afo, e lo perde su titulo acumula.
E titulo no ta uno extenso, pero e ta un kapstok unda cu tur e otro leynan lo bin colga bou di dje. E lo haci’e mas flexibel pa haci cierto cosnan pero den leynan mas abao. Asina tin mas cambio cu segun Sra. Paskel, DIMAS lo bay ta anunciando ariba nan website, nan Facebook y tambe nan mester ahusta nan buki di maneho. Awo si por bisa cu hopi cos ta regla ariba base legal.
Otro cambio cu tabata tin mester pa por opera ariba e manera cu ta bayendo, cu a cuminsa desde september aña pasa na manera digital, pero ta bay ariba e siguiente nivel, pa duna permiso electronico, e tabata falta un anker legal. Cu e cambio di ley, esaki ta bira posibel.
Y ariba tereno di control, tin ampliacion di bevoegheden, polis y inmigratieambtenaar a haya mas autoridad. Y tambe autoridad cu nan tabata tin como ‘toezichthouder’ a wordo amplia den ley. Y ta bay haci mas uzo di tecnologia y enbes di wanta un hende den vreemdelingenbewaring, awo ta bay haci aspecto tecnologico cu e no ta bou di bewaring, pero si e ta ‘onder toezicht’.
E parti di LTU pa peticion pa un permiso di trabao, e minister di Labor tin algo di bisa di esey. Desde 1 di november, e minsiter di Labor tambe a implementa e maneho nobo y den esaki, basicamente el a bisa cu tur cu tin di haber cu permiso di trabao, mester sea pasa pa registra of toets via DPL. Tin un cambio y lo mester bay custumbra cun’e. Pero awo, nan tin di pasa prome na Labor, unda cu nan lo mester pasa un toetsing. E toetsing ta pa verifica si no tin local disponibel ariba e mercado, y na di dos luga, si no tin, lo bay over na check si e persona cu ta aplicando pe, tin e cualidadnan cu ta bisa pa cual ta aplica pe.
Sra. Paskel, directora di DIMAS a sigui bisa cu esaki lo guia e Arubiano haya trabao y screen ken ta bin Aruba. Tur hende cu desde 1 di november ta aplicando na DIMAS, prome cu e ley a cambia, lo mester bin cu’n documento di DPL den nan man.
For di hopi aña caba, Aruba ta conoci pa un pais di migracion y cu e proyectonan cu tin den pipeline, por anticipa cu lo bay tin necesidad di mas migrante. Pero mas importante ta pa sa unda cu bo ke ta. A base di esey mester tuma decisionnan awo, pa asina contribui na e parti ey tambe. Un aspecto cu a bin hopi prominente den e maneho nobo di e minister di Husticia, ta e maneho di conocemento (kennismigranten). Esaki ta un parti di e economia cu ta den desaroyo. E maneho y ley actual cu ta na vigor desde 1 di december ta duna opcion na duna permiso di mas di 1 aña, pa cierto gruponan. Y tambe di cumpra retributie, por cobra vergunningsrecht na cierto categorianan. E ta bay duna cierto toolsnan. Pero tambe mester traha ariba e Ley di Implementacion, cual ta un tarea hopi grandi. Si DIMAS ta contento cu awo tin un ley y cu awo a base di e ley aki, por sigui traha. Te asina leu, Sra. Kathy Paskel, directora di DIMAS.

Comments

comments