Diabierna Departamento di Impuesto tabata tin un sesion informativo hunto cu Minister President y Minister di Finanza, pa loke ta e reforma fiscal. Directora di Departamento di Impuesto, Sra. mr. Luenne Gomes- Pietersz cu e relato.
A duna informacion un tiki mas den detaye y kico por spera den e proximo lunanan. Ta intencion pa haci algun cambionan per 1 januari 2019, y lo sigui cu e reforma den un di dos fase y di tres fase di e trayecto. Diabierna ultimo a duna e informacion na e stakeholdernan, caminda cu a splica cu pa cu belastingnan personal, Departamento di Impuesto lo haci cierto cambionan den tarifa di Loonbelasting y Inkomstenbelasting. Lo trece e cambionan via concepto di ley, y grondbelasting tambe lo conoce cierto cambionan y tambe lo tin cambio ariba tarifanan di invoerrechten ora ta trata sigaria, alcohol y tambe biña.
A splica esaki den un sesion parti mainta y Minister Presidente a bay un poco mas den detaye di e cambionan di ley cu lo bay parlamento dentro di poco. E meta principal di e reforma fiscal ta pa haci e sistema di belasting un tiki mas husto. E mester ta un poco mas senciyo y cu gobierno tambe ta haya su fairshare mas eficientemente den esaki. Y ora ta papia di eficiencia ta papia di eficiencia di duna Departamento di Impuesto pa cobra e placa cu ta ariba caya.
Ariba tereno di Inkomstenbelasting y Loonbelasting un grupo grandi lo mira un alivio, mirando cu ta trata toch cu’n schijventarief den 14 schijven den Inkomstenbelasting. Lo reduci esaki den 5 pa 6 tarifa, y e tarifa bieu di Tarief I y Tarief II lo no existi mas. Esunnan cu ta trahando lo haya un alivio den loonbelasting, lo keda cu mas cen den cartera y di otro banda lo haci cierto cambionan den grondbelasting,caminda cu propiedadnan cu ta wordo uza pa comerciantenan, dus propiedadnan comercial y tambe condominionan, dus hendenan cu no ta biba aki.
Ta un cambio di directe pa indirecte belastingen. Y den fase dos lo bay mira e sistema di BBO manera cu e ta awo y e recomendacionnan di IMF pa kico mester haci pa e ley di BBO manera cu e ta awo. IMF a wak e sistema fiscal y con nan ta opera como Departamento di Impuesto. Nan a duna algun recomendacion y un di nan ta pa mira e sistema di BBO manera e ta awo, ya cu tin BBO, BAZV y BAVP y tur ta cobra ariba e mesun suma cu ta e ganashi. Keto bay ta si e BBO mester ta ariba e factura, of no, riba e prijs of no, e construccion cu e consumido tin ariba e comerciante, tambe ta algo cu awo per 1 di januari a propone pa 1 januari por cambia pa por tin claridad di kico tin cu sosode cu BBO. Proposicion ta cu e mester ta ariba e prijs y no ariba e factura. Awo e discusion ta si ta 6,38% of 6%. Tin comerciante ta pone den e prijs y otro no.
SI e ley wordo aproba, tur comerciante mester pone e BBO den e prijs. E ta kita e discusion for di ariba mesa. BBO necesariamente mester ta specifica ariba factura. Y e cambio lo mester drenta na vigor pa 1 di januari 2019, si tur cos bay bon y e ley pasa den parlamento.