For di aña pasa a cuminsa encamina e proceso pa trece cambionan den e kiesverordening, esta e manera con un miembro di parlamento ta wordo escogi y finalmente ta drenta Parlamento. Esaki segun Sr. Dangui Oduber. Nunca den historia di pais Aruba e cambionan aki a wordo haci. Esaki ta prome biaha cu ta entrega un ley di iniciativa pa cambia e kiesverordening. E cambio di mas grandi den e ley aki ta encera cu un politico ta bin na remarke pa drenta Parlamento di Aruba a base di e cantidad di voto cu e ricibi durante eleccion y no a base di secuencia di number manera cu e ta na e momentonan aki. E ley a wordo entrega for di luna di Maart 2017 y despues esaki a wordo manda pa Raad van Advies. Una vez cu Parlamento a ricibi e sugerencianan di Raad van Advies mi persona hunto cu nos lider Evelyne Wever Croes cu tambe a firma e ley aki, a haci e cambionan necesario manera cu Raad van Advies a sugeri.
Na e momentonan aki tur cos ta cla pa e ley aki wordo trata. No por ta existi ningun excusa of motibo pa Presidente di Parlamento keda sin yama e reunion aki. Mi ta spera di por conta cu sosten y cooperacion di presidente di parlamento Sra. Mervin Wyatt Ras pa yama e reunion aki pa asina nos por yega na un votacion. Pueblo kier mira cual ta e parlamentario cu ta bai contra deseo di pueblo. E cambionan cu a wordo haci ta lo mas husto cu un politico por haci y esaki ta e fundeshi di un democracia. Un democracia ta funciona a base di mayoria y di mesun manera un miembro di parlamento mester wordo escogi. No por ta asina cu tin miembro di parlamento tin 47 voto y ta yama su mes representante di pueblo. Ora bo ta yama bo mes representante di pueblo ta pasobra realmente bo ta representa voz di pueblo den parlamento. E cambionan aki ta elimina por completo e fenomeno di politiconan sin voto ta drenta Parlamento.
E momento di berdad a yega pa parlamentarionan di AVP pa wak si nan ta para pa cambionan progresivo cu ta na bienestar di nos democracia. Esnan cu tin deseo di vota contra e ley aki lo wordo huzga pa e pueblo dia 22 september pasobra nan ta bai linea recta contra deseo di un pueblo.
Nos ta spera cu pa otro siman caba e reunion publico aki wordo yama y nos ta haci invitacion na henter nos pueblo pa bin atende e reunion aki pa nan mes por ta testigo kendenan ta bai contra deseo di nan.
Nos a cumpli cu nos meta di entrega e concepto di ley aki, nos a contesta Raad van Advies ma liher cu nos tawata por y awor tur cos ta den man di presidente di parlamento. E presidente di parlamento, desde awe tin net 30 dia pa yama e reunion publico aki pa nos por yega na un votacion y mi tin pleno confianza cu e lo cumpli cu esaki.