NASHVILLE, TN (Merca)- Un homber condena na morto pa dobel asesinato a wordo ehecuta diahuebs na Nashville (Tennesse) mediante ehecucion ariba e stoel electrico. E ta bira asina e prome persona den mas di 10 aña den muri asina ey na Tennesse, segun e portal di noticia The Tennessean.
Edmund Zagorski, di 63 aña na 1984 a wordo sentencia na e pena maximo pa tira y corta garganta di dos homber cu tabata di cumpra 45 kg di marihuana, e aña prome.
Despues di 34 recurso legal y apelacion, e ehecucion di Zagorski a wordo programa finalmente pa dia 11 di october ultimo.
Sin embargo, su abogadonan a argumenta cu e sedante midazolam uza den e procedimentonan aki, ta causa un dolor insportabel, pa cual autoridadnan a autorisa e homber aki na eligi e stoel electrico como un opcion mas lihe y menos doloroso di muri.
Contrario na e fecha inicial propone pa e ehecucion, or cu Zagorski a eligi di no ricibi su ultimo cuminda, e biaha aki el a opta finalmente pa un cuminda di porkchop marina y rabo di porco. Ademas, e otro presonan a haci un collect pa cumpr’e un pizza di despedida prome cu e el a bay den e rij di aislamento.
Segun un testigo, den su ultimo minuutnan di bida, Zagorski a pasa e mayor tempo ta wak su dilanti, aunke si el a tira un bista rond di e sala di ehecucion y a trek e cara ora cu a pone e fahanan na su man. Ora cu a puntr’e si e kier bisa un ultimo palabra, el a sclama: “Let’s rock this”.