Lenie Jeandor ganado di Premio Nacional di Teatro 2021

Manera ta custumber, tur aña Departamento di Cultura Aruba ta organisa e actividad teatral di mas grandi na Aruba cu ta relaciona cu Celebracion di Dia Mundial di Teatro. Anexo na e programa di celebracion, cada aña ta otorga e Premio Nacional di Teatro na un persona, grupo of fundacion cu a traha y cu a contribui grandemente cu e desaroyo di teatro na Aruba.

Pa loke ta trata e aña 2020, na unda Aruba a confronta cu’n aña di Pandemia; no por a haci e celebracion aki, motibo pa e cual a opta pa otorga e Premio Nacional di Teatro “Reconocemento Special di Bida Largo” e aña aki na: Cas di Cultura Aruba’s Cultural Plataform sice 1958, pa su Celebracion di mas di 60 aña na servicio teatral, tur aporte,  congresonan y proyectonan asina valioso den cooperacion pa lanta arte di tarima aki na Aruba y pa nan reconocemento y trayectorio, tanto na nivel  nacional como internacional.

Na aña 2021, a otorga e premio aki na e directora, Actriz y escritora di teatro, Lenie Jeandor, pa su trayectorio y excelente aporte den e mundo teatral y pa e valioso publicacion di su 2 buki: “Manual pa Escenario”.

Algun di e Premionan aki otorga den pasado tabata lo siguiente:

Na aña 2005, a tuma luga e prome celebracion di Dia Mundial di Teatro y a presenta full un siman teatral, na unda e grupo di teatro local Asociacion MASCARUBA a bay cu e prome Premio Nacional di Teatro, como reconocemento pa nan 44 aña di existencia den e aña ey y pa e trabao incansabel y pa e desaroyo di teatro den nos comunidad y nan representacion na nivel nacional y internacional.

Ademas e grupo aki a lanta for di mesun aña cu a tene e celebracion aki, mundialmente.

Na aña 2006, e autor, critico, actor, periodista y director di teatro Juby Naar, a bay cu e reconocemento aki bon mereci pa su valioso aporte y añanan di experiencia den e area artistico aki, contribuyendo grandemente den e mundo teatral den nos comunidad.

Na aña 2007, e maestro, directora y actriz Amy Lasten a haya e reconocemento aki pa su incansabel aporte y trayectoria trahando specialmente cu hoben y su dedicacion como maestro di teatro. Ademas señora Lasten a traha, durante su funcion di encargado di e Seccion di Teatro na Instituto di Cultura Aruba, diferente tayer y festival, manera FESTESECO cu a crea un impacto exitoso plantando un simia grandi den curason di diferente hoben cu awendia ta desaroyando nan mes grandemente den e mundo aki.

Na aña 2008, e autor, director, actor y compositora Carmen Herrera y grupo teatral Kibrahacha a conkista e logro aki pa su añanan di experencia y representacionnan na nivel nacional e internacional, na unda a registra diferente obra den un forma magistral den un buki cu ilustracion y cantica cu a uza den cada obra.

Na aña 2009, e autor, director y actor, señor Oslin Boekhoudt (dfm), a conkista e logro aki pa tur e añanan di experiencia y dedicacion pa cu teatro na nivel nacional y internacional. Un lista di cantidad di obra a ser dirigi exitosamente pa su persona, ademas di a gana e confiansa y respet di hopi hende cu a consider’e e Tata di Teatro na Aruba.

Na aña 2009 tambe a entrega e “Reconocemento Special di Teatro di Bida Largo” cu cada lustro lo ser otorga na un persona, cu a dedica henter su bida na servicio di teatro, pa su trabao, sacrificio y aporte den e campo teatral. Pa e prome biaha e tecniconan di Cas di Cultura Aruba, Richard Hopmans  y  Rolande Bryson a bay cu e codiciado y excelente titulo aki.

Na aña 2010, e reconocemento aki a ser duna na e presidente Internacional di Teatro Amateur Leo Tromp, Kende tambe a fungi pa hopi aña como presidente di IATA y FUNDARTE.

Na aña 2011, e reconocemento aki a ser duna na e comediante sr.Vale Croes, (dfm), kende tambe a celebra su 50 aña como un di e miho comediantenan na Aruba.

Na aña 2012, e premio a bay pa drs. Mirto Lacle, Gestor Cultural.  “Un homenahe na cultura y cuentanan di Compa Nanzi, 1952 pa 2012” y cu e proyecto y ciclo multidisciplinario presenta na Cas di Cultura den luna di maart 2012 titula: Cas di Cultura converti den Cueba di Compa Nanzi, cu a encera 4 proyecto den uno.

Na aña 2013, a otorga e premio aki na Diana Antonette, den su hubileo di 45 aña di Actriz y 30 aña directora di Teatro di Danza Arubano.

Na aña 2019, despues di 10 aña lo otorga e Premio Nacional di Teatro “Reconocemento Special di Bida Largo” na e actriz, comediante, productor, escritor di teatro, Faritah Luidens cu su celebracion di 50 aña den farandula cu su Mega produccion “Ken ta Basha Abou”. El a presenta conhuntamente cu Cas di Cultura e show unda a resalta su personahe Tica Basha Abou cu su persona ta representa y tambe den e mesun rosea a duna 5 reconocemento special na 5 grandi, veterano, di teatro cu lo ta trahando directamente cu Faritah Luidens den su produccion manera ta: Luty Martinez, Yvonne Spellen, Magda Nicolaas, Harold Pereira y Elsa Krosendijk.

Masha Pabien na tur persona cu ta forma parti di e lista aki y tambe nos ta spera cu pueblo por duna libremente e recomendacion pa e premio aki cu lo ser entrega na aña 2022.

Manda boso peticion cu e motivacion di e nominacion y biografia di e persona, organisacion, maestro, actor, productor, grupo escritor, etc, na Departamento di Cultura Aruba y ban sigui duna reconocemento den bida na tur protagonista cu ta traha incansabelmente pa mantene e arte di teatro na halto.

Comments

comments