CALIFORNIA, Merca – E actor Mericano, Martin Landau, kende a gana un premio Oscar pa su trabao den “Ed Wood” na 1995, a fayece cu 89 aña, segun su representante a informa.
Landau a fayece diasabra di “complicacionnan inespera” despues cu el a wordo hospitalisa den un centro medico di e Universidad di California, segun e agencia di noticia EFE.
“Ta nos tristo deber di informa di e morto di e iconico actor Martin Landau. El a caba di celebra su di 89 cumpleaños,” su representante Dick Guttman, a bisa.
E actor a debuta riba e escenarionan di Broadway y na 1959 tabata ora cu el a yega pa prome biaha riba e pantaya grandi na man di Alfred Hitchcock den e pelicula “Intriga Internacional” – tambe conoci “The Second Verdict”, hunto cu Gary Grant y Eva Marie Saint.
Posteriormente el a participa den “Cleopatra (1963) hunto cu Elizabeth Taylor y Richard Burton, “The biggest story ever told” (1965) y “Nevada Smith” (1966) cu Steve McQueen.
Ademas, den e mesun aña el a uni na e elenco di “Mision Imposible”, serie cual el a interpreta e maestro di disfraz Rollin Hand y tambe unda cu a actua hunto cun’e, su casa, Barbara Bain. El a gana un Golden Globe y a wordo nomina na tres Emmy.
E Oscar a yega na 1994 debi na su actuacion di Bela Lugosi den e pelicula di Tim Burton “Ed Wood.”
Fuente: www.ntn24.com