Desde 17 di october, Cannabis recreacional ta legal na Canada. Sr. Erick Nassy, drugscoordinator ta amplia mas ariba esaki.
Al parecer, e motibo di e legalisacion tabata cu nan lo tabata perdiendo e guera contra di marihuana. Pero un di e motibonan mas fuerte ta e fuente di ingreso na belasting cu esaki ta trece cun’e. Na Hulanda, nunca cannabis tabata legal. Na maart 1976 a scoge pa tolera e consumo di droga, den coffeeshop y ariba caya. E tolerancia t’ey caba. Hulanda a haci’e puramente pa haya entrada financiero, pa haya mas placa na belasting. Tanto Canada como Hulanda a haci esaki.
E reglamentacion, e mecanismo di control. Aki na Aruba, muchanan di 16 aña ta ariba caya. Nos tin leerplicht pero e mecanismo di control no ta na su luga, mescos cu e mecanismo di control di hopi otro cos. Aki na Aruba no por ni controla e tiki cosnan cu tin caba, manera alcohol, sigaria. Esakinan ta dos droga cu ta socialmente acepta. Pero no tin control ariba e benta di alcohol. E mecanismo di control, ora cu kier yega unda Hulanda, Canada y Suisa ta, unda cu na e pais ultimo aki tin un parke caminda cu ta haya hangua limpi pa bay uza droga. Esaki ta pa controla tbc, HIV y demas malesanan cu ta bin cu e uzo di droga, pa mediante di droga.
Un biaha mas, e mecanismo di control na Aruba, no ta funciona. Pero pa Aruba yega na unda Canada ta, ta aworaki gobierno a institui un comision cu ta studiando e introduccion di marihuana medicinal. Hopi cos ta wordo copia for di Hulanda, pero no tur cos cu ta wordo copia por fit den e sistema ‘Rubiano. Pa loke ta e tema di marihuana medicinal, apenas a cuminsa discuti ariba e tema aki. Te ainda tin un confusion grandi na Aruba, unda cu por wak cu e mecanismo di control no ta funciona.
Ta papia di recreacional, pero mester specifica con, sea e ta pa huma of pa e wordo uza como remedi. Esaki ta loke niun hende no ta specifica, segun Sr. Eric Nassy, drugscoordinator.